Керттера теркоам цига тӀабахийтар, даар кийчдеш йолча моттига, из я 500 квадратни метр совгӀа. Цу проекта чуйоагӀаш къаьнара плитка а хийцар, чура балхаш даьхар, фо чудоагӀа моттиг кийчйир, газ хьачуйоагӀаш йола турбаш хийцар, йӀовхал, ток хьаялар тоадир, кхача кийчбе керда гӀирс ийцар. «Йоакхо» яхача интерната кулгалхочун гӀончас Доврбиканаькъан Маликас шийна хетар аьлар балхаш йистедаларах.

«Тхона из доккха новкъостал да, оаха сатийсадар цунга. Моттиг безаме хургйолаш дола хьалаш хьакхеллад», - аьлар цо. Мехка Кулгалхочо ший оагӀорахьара баркал аьлар Гуцаранаькъан Микаила, цо иштта новкъостал дарах дувцаш. Цо белгалдир, керда хьалаш хьакхолларо таро хулийтаргья берашта укхаза даха, иштта хьалхадаьккхар, хьадаь даьннар лораде, аьнна.

Къаьстта Келаматанаькъан Махьмуд-Ӏаьлас белгалдир деррига а хила деззача боараме хоза, нийса хьадаь хилар, цу юкъе Роспотребнадзора, цӀи ялара кхерамзлен, кхыйолча организацеша мах оттабаь хилар а чулоацаш. Цул совгӀа, мехка Кулгалхочо хьоахадир, хиш цӀендеш йола моттиг хилча дика хургьяр, аьнна, из хаттар цо дувцаргда ГӀалгӀай Республикан энергетикан, вахара-коммунальни боахама министраца Лоалахой Ахьмадаца.

Махьмуд-Ӏаьлас белгалдир, таханарча денга цӀена хий хилар ерригача республиканна эшаш да, из цахилар воча оагӀорахьа Ӏаткъаш а да, аьнна. Иштта дийцар берий цӀагӀа-интернате Ӏеш долча берий могашалах лаьца, цул совгӀа, цига болх беш болча наха фу хетт а хайра, цӀенхаштта интернат тоаярах. Могаш доацача берашта эшаш дола хьалаш вӀаштӀехьадахар, юкъара вахар тоадара ца хилча даргдоацар да.

Белгалдаккха деза, Гуцаранаькъан Микаила «САФМАР» яха ганз хилар бахьан долаш, «Йоакхо» яхача берий цӀагӀа-интернате уж балхаш дӀадахьа таро хилар.