Мехкадас даькъалайийцар Гӏалгӏайчен таьрахьий дегӏаахара Академи
Гӏалгӏайчен кулгалхочо Келаматанаькъан Махьмуд-Ӏаьлас шолха цӏай нийсдаларца даькъалайийцар таьрахьашца дегӏаахара Академи - дешара моттиго ший-кхо шу далар дезду, иштта безбу Магасерча «Ишкол 21» хьалхара выпускникаш. Укхаза дийша даьлар хьалхара керттера дешар, 71 къонача ИТ-говзанчо хьаийцар сертификаташ.
Республике Академи хьакхеллар мецената Гуцаранаькъан Микаила, массайолча оагӏорахьара хьал а лоацаш. Тахан из накъайоалаш я лакха говзал йола болхлой кийчбарца, цо цхьан даькъ тӏа вӏашагӏтох «Ишкол 21» яха Сбера хьалхале лелаю моттиг, Гӏалгӏайчен Бизнес-акселератор, балха даькъ тӏа лакхвалара йола Центр, иштта авторски дешара программаш, цунца цхьана кагирхошта лакхача технологей таронаш хьа а еллаш.
«2024 шера Магасе хьайийлла «Ишкол 21» Къилбаседа Кавказа федеральни куран тIа хьалхара я. Укхаза дешаш Гӏалгӏайчен бахархой хинна ӏац, вай заман таьрахьий таронаш караерзае йиш йолаш ба мехка тайп-тайпарча регионашка баха нах. Из хьайийллача хана денз, 3000 совгӏа саг цу ишколага гӏолла чакхваьлар. 148 сага цига дийша валале болх корабир, царех 66 Академе дегӏаахара Центра новкъосталца балха эттар.
Выпускникаш болх беш ба МТСе, Яндексе, «Роснефте», «Россеташка», ВГТРК, ГТРК «Гӏалгӏайче», Россе МЧСе; Гӏалгӏайчен промышленноста, таьрахьашца дегӏаахара Министерстве, Гӏалгӏай паччахьалкхен университете, иштта кхыча моттигашка. Хӏаьта таханара ди лоархӏаме да - хьалхара выпуск. Цига деша баьгӏараша ӏомадир керда дешар, проекташ, тоабашца цхьана болх бар, хьалхашка латта чоалхане декхараш кхоачашдар. Дуккхабараш укхаза хьабоагӏача хана ӏТ даькъ тӏа хӏама ховш бацар, тахан хьалхара гӏа баьккхар кердача профессена накъаболхаш», - аьлар республикан кулгалхочо.
Келаматанаькъан Махьмуд-Ӏаьлас белгалдир, укхаза деша багӏаш цар хьаийцар, доккхий толамаш дахара наькъ тӏа накъадаргхилар.
Республикан Кулгалхочо баркал аьлар Гуцаранаькъан Микаила, цун новкъостал хиннадецаре из проект республике хургьяцар. Иштта цо даькъалабийцар Академе беррига болхлой, цар лакха къахьегам белгал а беш.
