Мехкада нах тӏаэцаш хилар
Гӏалгӏайчен кулгалхочо Келаматанаькъан Махьмуд-ӏаьлас нах тӏаэцаш ди хилар. Цига дийцар тишъеннача фусамашка бахача наха лаьрхӏа керда вахара фусамаш хьаярах, юкъарча дешара моттиг хьалъярах, иштта наькъа-транспорта даькъ тӏара хьал кердадаккхарах. Къаьстта терко тӏаяхийтар лаьрххӏача тӏема операце доакъашхошта, цар дезалашта новкъостал дара. Хӏара хаттарашка ладийгӏар, царна мах оттабир, уж дӏахо кхоачашде лаьрхӏар.
«Эккажкъонгий-Юртара кхалсаг ера ший хаттар дахьаш. Осканаькъан урамах №63, №65 йола цӏенош хьалдеш да тишъеннача фусамашкара нах цар чу бахара. Из болх мичахьа кхаьчаб, цох бола хоам ха безам болаш яр из. Мехкадас тӏадиллар из хаттар ма дарра тахкар, цун инженерни балхашка хьажар. Уж ший законах доагӏача беса хьадаь дале, лерттӏа хургда. Нагахьа санна даьдеце, цунна бокъонаш лораераша мах оттабергба. Къаьстта хьежар Магӏалбикерча №20 йолча ишкола хьалага. Из гӏишло хьалъяьй 1974 шера, тахан цига деша дагӏа 920 бер. Цу гӏишлон тишъялар 82% кхоачаш да. Иштта тхов тилла безаш, тӏунал латташ, кхыдола кхоачамбоацараш да цига. Республикан гӏишлон Министерствос керда ишкол хьалъе лаьрхӏад 1,2 эзар моттига. Дешара Министерствос федеральни хоржама болх дӏахьоча дакъа лацара эшаш дола каьхаташ кийчде деза. СВО веннача бӏухочун Чертой Ӏамархана нана – Могушканаькъан Лиля ера, Макка хьажол де яха новкъостал дехаш. Ӏамархан велар 2025 шера, бекарга бетта 29-ча дийнахьа, цун валарца елар Жукова орден. Хьатӏадоагӏача шера цунна лаьрхӏа хьажол - 2027 яхача списка тӏа моттиг хургхиларах тешайир из. Илдарха-Гӏалан вахархочун Моашхой Ӏалаудина дехар дар, Комарова урам тоабарца дувзаденна. Хӏанз из никъ воча хьале ба. Ӏалаудина ши воӏ СВО дакъа лоацаш ва. 460 метр бӏаьха никъ тоабара проект хӏанззе а кийчъяьй. Иштта шахьара администрацена хьалхашка декхар оттадир, из хаттар тӏехьа ца доахаш тахка, цунга дӏадодар фуд хьажа, аьнна. Балхаш юкъехьоргда 2027 шера долча декхарашта, хаттар тӏахьожам болаш хургда», - язду Келаматанаькъан Махьмуд-ӏаьлас ший телеграм-оагӏон тӏа.
Республикан Кулгалхочо нах тӏаэцаш хиннача дийнахьа хинна наьха хаттараш кхоачашдергда из гӏулакх леладеча ӏаьдала болхлоша, иштта моттигерча доал деча даькъ тӏарча ӏаьдало.
Уж кхоачашдеш малагӏа болх баьб гуш хургда, республикан Кулгалхочунга цар цу хьакъехьара лоткъам беш.
