Из волейбола, баскетбола, воркаута майдаш чуйоагӀаш, хьалхара хьалъеш йола спортивни комплекс я. ХӀанз цу даькъ тӀа йистедоалаш латт, кӀийле яра, аьшка пенаш вӀашагӀдехкаш дола балхаш. Волейбола, баскетбола майдаш кийча я ала йиш я.

«Вай республикан хӀара вахархо таро йолаш хила веза, спорте дакъа лаца. Из лоархӀаме да цар могашала санна, кагирхоша салоӀа ха дӀаяхьара а. Россе президента массайолча хана белгалдаьд, 2030 шерга кхоачаш, 70% Россе бахархой спорте дакъа лоацаш хургбола декхар керттера хилар; гӀулакха эшаш йола таронаш массаза хилар: ФОКаш, спортивни майдаш, иштта кхы а дуккхадар», - аьлар ГӀалгӀайчен Кулгалхочо.

Белгалдаккха дезаш да, тахан федеральни а моттигерча а боараме цу гӀулакха терко лоаттаеш хилар. Оаха кхетаду физически культура дегӀайоалаяр, наьха могашал дикагӀа яр, эшаш дола хьалаш хьакхоллар - из керттера долга, цунца цхьана ГӀалгӀайчен спорта начӀал а дегӀайоагӀаш хургйолга.

«Аз баркал оал АьдагӀий мехка кулгалхочунна Кумпилов Мурада, цо вай республикан иштта дика совгӀат дарах. Из спортивни гӀишло, цу юрта бахача наха чӀоагӀа накъаяргья, цунца шоай могашал а тоаергья!» - аьлар Келаматанаькъан Махьмуд-Ӏаьлас.