«Тахан вайна дагаух къизал, гӀелал тӀаена, Сибре, Юкъерча Азе, цу цӀайза денача Ӏай, 1944 шера саькура бетта 23-ча дийнахьа мехкахбаьхараш. Массехк сахьат мара ца луш, сихонца кийчбала бийзар цар, гаьнарча наькъа бала, бӀарчча къам мехкахдаккхар доккха таьзет дар. Цу дийнахьа, вӀалла бехке боацаш бола боккхий нах, бераш, кхалнах, цхьаккха тайпара бокъо йоацаш бисар, шоай дезал кхебеш, дезарех баьхка уж йоккхийча халонашка кхоачабир. Цу хана вай къаман къонгаш Сийлахь-боккхача Даьймехка тӀем тӀа моастагӀчоа духьала латаш бар, шоай са ца кходеш из эшавеш, хьалхарча мугӀарашка турпалал гойташ хьабоагӀаш бар уж.

80 шу дӀадаьннад, аьнна хеталу, бакъда цу хана хинна чов адамий дегашкара дӀаяьннаяц, из бала а бицбеннабац, вай дегашка тахан а гӀайгӀа я…

Цига, ший хьамсарча мехка вала хьагаш мел венначун моттиг Дала даькъалайойла.

Доккха Ӏазап тӀаденадар аьнна,беха хиннабац гӀалгӀай, вай Ӏадаташ диц ца деш, шоайла барт болаш, денал гойташ хьабаьхкар уж.

Баркал массанена, цу халача ханашка вай хьаллаьцарашта!» - язду ший телеграм-канале ГӀалгӀай Республикан Кулгалхочо.

Келаматанаькъан Махьмуд-Ӏаьлас белгалдир, тахан итташ шераш дӀаихадале а, дерригача къаман дагайоагӀа из ха, цу хана хинна къизал. Цо байнарашта гештдар, хьамсара мохк лорабар, из тоалуш, дегӀабоагӀаш хилар дийхар Даьлагара.