«Тхона эггара дукхагӀа эшар, шун юхь сийрда хилар, дог делаш хилар да.

Миччахьа со хиларах, моллагӀа халонаш сона хьалхашка нийсъяларах, сона массаза хов, се везаш йолча сай наьна дего лоравелга.

Кхалсаг - из я шийна гонахьардар хоздеш, тоадеш, дуне хозагӀа хулийташ, йӀовхал луш, из деррига хьакхоллаш яр. ЦӀагӀара йӀовхал, дезала юкъера барт, лоархӀам, сий - из хьалхарча аргӀагӀа шугара хьадоагӀаш да», - аьлар ГӀалгӀай Республикан Кулгалхочо, ше цӀайца дувзаденна кхайкарал деш.

Иштта цо Россе бӀухой ноаношта, цар фусам-ноаношта, йижарашта, мехкарашта доагӀаш дӀайха дешаш аьлар; боккъонца бола къонахий, Даьхен лорбой, денал дола маӀанах кхебарах.

«Къаьстта баркал ала лов сона, вай Россе Турпалхой ноаношта. Баркал шоана, низ бола ноаной, дика къонгаш кхебарах», - аьлар мехка кулгалхочо.

ГӀалгӀайчен кхалнаьха ираз, аьттув, могашал хилар ловш дола ловцаш даьхар цо.