«ГОК Гӏайрбика-Юрт-Соагӏапче» машина никъ цӏенхаштта тобеш латт
«ГОК Гӏайрбика-Юрт-Соагӏапче» машина никъ тоабеш латт. Из лоархӏаме никъ ба Магӏалбика, Наьсарен кхалешта; цига хӏара дийнахьа цхьа эзар гаргга машинаш лел, цу юкъе юкъарлон транспорт, ишколай автобусаш, сихача гӏулакхашта лаьрхӏа йола техника я.
«Сердало» газетага ма аллара, из моттиг 13, 6 км йӏаьха я, «Вахара хьалаш тоадар» яхача къаман проекта чубоагӏаш ба из болх. Никъ ӏобиллаб 2016 шера, дукха ха яр из кердабаккха беза, укх шерашка цу тӏа дукха транспорт леларах, цхьацца йола наькъа моттигаш тоае езаш яр. Таханарча денга кхоачаш, цу наькъ тӏа чӏоагӏа асфальт ӏобуллаш латт.
Дӏахьоча балха дикала тӏахьожам лоаттабу республикан кулгалхоша. Цига каст-каста хул республикан кулгалхой. Тӏахьожаш ва республикан машина наькъий, транспорта министр Хаматхананаькъан Батыр. Министра ше тохк технологеш лелаяра хьал, уж декхараш подрядчикаца дувц.
Хаматхананаькъан Батыра белгалдир, къахьегама тоаба шоаш массаза беш бола болх дӏахьош я, цунна балха эшачунца кхоачам баьб, йийлла ха а лораю, цхьадола балхаш ханал хьалха а кхоачашду.
Из болх чакхбала безаш ба шин шера. Хьалхарча аргӏагӏа ворхӏ километр никъ тоабергба, карарча шера из йистебоаккхаргба. Деррига балхаш хьатӏадоагӏача шера йистедаха хьожаргба. Укхаза 168 керда наькъа белгалонаш оттаергья, 2 401 метр йӏаьха карт хургья, наькъа оаса бохийтаргба.
Кердабаьккха никъ бувзам беш хургба юрташта, лорий урхалленашта юкъе, цо ерригача кхален наькъий кхерамзлен оагӏув дика тоаергья.
