«Краснодар-2023. Ахкана кубок» яхача спортивни яхьашка дакъа лоацаш хиннараш Россе тайп-тайпарча моттигашкара 8 команда яр, уж дӀайихьар маьцхали бетта 23-ча денгара 28 денга кхаччалца. Ловзар дӀадахьара командаш шин даькъа йийкъа яр, толаш йола ши моттиг дӀалоаца тоабаш полуфинале йоалаш яр, уж керттера моттиг яккхара тӀехьа лайзар. «Ангушт», «А» группанна чуйоагӀаш, ловзаш хилар Махачкалерча «Сокол», «ДФЦ Сочи», Ростоверча «Спарта» яхача командашца. ГӀалгӀайчен къонача командан тренераш бар Ноакастхой Алик, Мархенаькъан Дауд. Хьалхарча даькъах ловзаш дика ловзар гойтар Хьулахой Ӏаддал-Малика, Тирканаькъан Илеза. Ловзара чаккхенга диллача, селий мехкарча, краснодарерча «Кубанаца» къовсабелар вай футболисташ. Царех цхьаккха котваланзар. Плей-оф (ийшар аравоалаш) лайзача керттера оттаяь хинна ха а йистеяьлар чот 1:1 йолаш, бургац чутохарца белгалваьлар Албохчанаькъан Мухьмад. Сочерча командаца ловзаш, вайбараш ийшар, бакъда яхь йистеяьнначул тӀехьагӀа лайзача хана, уж котбаьнна хилар бахьан долаш, «Ангушт» яха РСШ яхьий финале хилар«, — аьлар кепайоазонга. Белгалду, котбаьннарашта Кубок, майдилгаш, дипломаш денна хилар. Иштта «ДикагӀвола яхьан ловзархо» яха совгӀат делар Имагожанаькъан Мухьмада. ХӀаьта Тиймарзанаькъан Ӏумар; дикагӀа вола защитник ва, аьнна; белгалвир.