Наьсарерча Московски оалача урамера болх чакхбала гарга ба
Московски оалача урамера болх дикка гаьнабоалаш латт. Юххьанца лаьрхӏа хиннар керда сквер хьаеллар мара дацар, бакъда шахьара да волча Оздой Руслана из болх кхы а дӏашерб, аьнна, тӏадиллар. Шахьарера моттигаш тоаярах йолча федеральни программага гӏолла дӏахьош болх ба из.
«Боккха болх ба укх моттиге цу юкъа дӏабихьар. Хин лини хийцай, сквер тоаяьй, иштта гонахьарча доазон тӏа кулг техад. Тахан керда асфальт ӏобуллаш къахьийгад укхаза. Тиша, шоаш дуаргдар диа яьнна хин турбаш хувца езаш хиларах, болх гаьнабаьннаб. Хин турабаш ца хувцаш, асфальт ӏобиллар харцахьа хургдар, хӏана аьлча юха бохабе безаргбар асфальт уж хувца эттача», - дийцар «Сердалога» Наьсарен кхален администраце.
Болх чакхбаьккха бала боахк тахан. Гаьнаш, кӏотаргаш дӏайогӏаш, берашта ловза моттиг тоаеш, болх дӏахьоргба тӏадоагӏача кӏира.
