«Из дика гӀулакх дагадехар яр, Ерригроссе къамашта юкъерча кагирхой союза моттигера отделени. «ГӀалгӀай мотт сурт-сибаташца, дешашца» - из ший тайпара кхетам луш йола программа яр, гӀалгӀай мотт боаржабара, лорабара, халкъа культура йовзийтара эш из. Яхьа юкъейоагӀаш яр укх тайпара моттигаш: «Дешай тӀом», «Таржами маӀани», «Дешари кхетами», «Истории культуреи». Цун доакъашхой бар республикан ялх ишкола дешархой. Кхелахой болх дӀахьош бар «Магас-Шахьара лицея-берий беша» гӀалгӀай метта хьехархой, ГӀалгӀай Республике гӀолла йолча Ерригроссе къамашта юкъерча кагирхой союза кулгалхо Оздой Инал, цун гӀонча ГӀамарзанаькъан Мухьмад. ДукхагӀа жоп денна хиларах, хьалхара моттиг Пхьилекъонгий-Юртарча №4 йолча ишкола «Сув» яхача тоабанна елар, шоллагӀа моттиг - Наьсарен лицея дешархошта, кхоалагӀа моттиг- «Магас шахьара лицея-берий беша»,-аьлар хоамо. «Баьча балха чаккхе еча хана, нийса жоп даларал совгӀа, гӀалат ца воалаш, дош ала ховш хилар а дӀалоархӀаш дар. Котбаьннарашта массанена а дипломаш, совгӀаташ делар», - аьлар Оздой Инала.