Ерригача Россе яхье белгалбаьлар, вай мехкара Ӏадсаькх деттараш
04.12.2023 15:44
Рязанерча наха лоархӀаш волча Малахов М.Г. цӀерагӀча «Россе Турпалхочун совгӀаташ» яхача ерригача Россе яхье белгалбаьлар вай мехкара Ӏадсаькх деттараш, арбалетаца хьакхаштабаьннараш. Из хоам «Сердало» газетага бир спорта гӀулакхех йолча министерствос. ДӀабахача бетта 30-ча дийнахьа дӀайолаенна укх бетта 4-ча денга кхаччалца, лаьттар уж яхьаш. Россе моттигашкара 300 совгӀа спортсмен вар цига вена.
Вай мехкара вахача виъ сага лакха говзал гойтар цига. Дошхьакхалой Ӏумара, ГӀайрбиканаькъан Ӏалихана, Боранаькъан Ислама хозача оагӀорахьа дӀахьекхар шоай начӀал. Чопанаькъан Ислама даьккхар дотув, Россе спорта мастера декхараш кхоачашдеш.
Тоабашта юкъе боарза майдилг йоаккхаш, белгалбаьлар вай мехкахой. Доккха баркал аьлар цар, цу турнире дакъа лаца шоашта гӀо даьрашта. Уж ба МДК кулгалду Алхастанаькъан Аьсет, № 8 йолча ишкола кулгалхо Оздой Хьусен, Шолжа-Шахьарерча, Илдарха-ГӀалий тӀарча ОНДиПР хьалха латта чухьарча гӀулакхий подполковник Султиганаькъан Урусхан.
