«Кхадж тасса хьабоагӀача наьха кхерамзлен Ӏалашо яь хила еза, цунна керттера теркам тӀабохийт. Хьалха мел хинна хоржамаш а, иштта новкъарле йоацаш дӀадихьад. Вай кхадж тоссаш бола нах бехктокхаме а, шоай гӀулакх довзаш а ба, дизза декхар кхоачашде Ӏемарех а ба», - аьлар Макшарипа Махьмуд-Ӏаьлас.

Цо иштта белгалдир, тахан Российски Федераценна духьалбаьнна моастагӀий болча хана, къаьстта лоралуш а теркам тӀабохийташ а хила деза вай воай хӀама дӀадахьара. Цу хьакъехьа, хӀара  моттигерча бокъонаш лораяра болхлоша, иштта Россе бахархоша цхьоагӀо лелаю.

Махьмуд-Ӏаьлас иштта белгалдир, РФ Президент хоржаш,  тохкам бара болх дӀабахьар, хоам бар, хоржамашта кийчо еча хана из нахага дӀакхачийтар лоархӀаме да, цига хӀара саг ший дакъа юкъеда декхарийла а ва, аьнна.

Кхадж тоссача дакъа лоацаш волча хӀара сага моллагӀа хоам уйла яь, кхетабе беза, тайп-тайпарча къамаьлех теша йиш яц,  тешшаме цох лаьца хоам болаш ба гӀирсашка.

«Оаха лаьрххӀа йола терко ю дӀа-юха лела таро йоацача наьха, могашал яйнарашта. Кхадж тоссача дийнахьа хӀара даькъ тӀа заӀапхошта лаьрхӀа моттигаш кийчъергья. Иштта хӀама ца хозаш, е бӀарга ца гуш болча наха лаьрхӀа а хоамаш тӀадола улгаш хьалтеха хургда», - аьлар Махьмуд-Ӏаьлас.

Цу тайпарча наха шоай конституционни бокъонаш йоагӀача беса кхоачашъергйолаш, ГӀалгӀайче эшаш дола хьалаш вӀашагӀдохкаргда. Цар дика дакъа лаца деза, цох кхычарна масал хургдолаш.