Вахара хьал хувцаделарга хьежжа, тхьовра денза хьайоагIа цхьайола профессеш дIаювлаш, царна когаметта кхыдола кердадараш гучадувл. ХIаьта вай республике, из оагIув эшам болаш ба таханарча дийнахьа. Масала, унахцIенон оагIув хьаийцача дукхагIа болчара хоржар лорий йиший дешар да, хIаьта вайцига ца тоараш КТ, МРТ йоаха болхой ба. Из бахьан долаш йоккхий аппараташ цхьан дарбанчера кхыйолча дарбанче дIакхахьа езаш хул. Технологен гIулакх довза атта дац, цунга хьежжа цу оагIон говзал я Iомае езар. Иштта хилча мара, ма хетта, дIагIоргдац вай республикера гIулакхаш.

ДукхагIча даькъе вай терко е езар, тахан доацар, эггара хьалхарча юххьанца эшаш дар, ха дезар да», — аьлар ший къамаьла юкъе Келматанаькъан Махьмуд-Iаьлас. Мехкдас белгалдир, болх бе нах ца хиларах АПК кхуврче, промышленносте кхыча регионашкара инженераш, техникаш хьакхувла безаш хул аьнна. «Южный» яхача птицекомплексо Краснодарера болхлой хьакхувл, «РИАЛ» алюминий завод Ростовера инженераш оарцагIакхувлаш болх бе безача кхаьчай.

ХIаьта вай хьабе болх бац, моттигаш таац яхаш дагIа. Цу дерригнен бахьан да, кагирхоша деша оттача хана аттагIа йола, наха юкъе дикагIа лоархIаш йола профессеш хержар. «Диплом цкъа хьаийцача, тIаккха ховаргда-кх «яхача уйлаца дIаболх уж. Из нийса дац! Ишттача уйлаца професси харжар массе хана харцахьа хиннад. МоллагIа саг ше вахача мехка накъа воалаш, бахархошта эшашагIа дар хоржаш хила веза», — аьлар Мехкдас. ХIара саг, Дала цхьацца начIал денна кхеллав.

Нийсача оагIорахьа шийна ховр доаржадеш дIавахар — из да эггара лоархIамегIа дар. Ишттача уйлашца ший никъ хьахержа дIаволавеннар, боккхача аьттонга кхоачаргва, дика болх-моттиг нийслургья, ше хьаийца говзал беркат хургдолча оагIорахьа караерзаяь нахаи шийнеи накъавоалаш вахаргва аьнна чIоагIдир, къаман вахарах дог лазаш волча, вай Мехкдас.