«Юрт-Ганз» яха кагирхой фестиваль дӏахьоргья Магӏалбике
Магӏалбике хилар «Юрт-Ганз» яха юрташкарча кагирхой фестиваль. Республикерча этнокультультуран проекта чуйоагӏаш яр из фестиваль. Орджоникидзе Серго цӏерах йолча шахьарерча парке хилар цӏай. Фестивала кхоалагӏа – тӏеххьара доазув хилар тӏема сийлен шахьарах. Белгалде деза, «Юрт-Ганз» Наьсарен кхалерча Дошлакъий-Юрта, дӏахо – Гӏажарий–Юрта хиннилга.
«Сердалога» кхаьчача хоамах, Магӏалбика бахархошта, хьаьшашта лаьрхӏа кийчъяьр йоккха программ яр. Парке шоай балхаш гойташ бар вай мехкара тайп-тайпара хӏамаш шоай кулгашца хьаеш бола пхьараш, иштта шоаш болх мишта бу дӏахьокхаш хилар уж гулбеннарашта.
Гӏалгӏай къаман даараш оттадаь а моттиг хилар цига, дӏайихьар спортацара, къаьнарча ловзарашцара яхьаш. Цул совгӏа, кхоллама кхетаченаш, кхыйола яхьаш, цхьацца балхаш довзийтар а хилар цига.
Къаман культуран тӏехьале йовза, яхьашта юкъе дакъа лаца, ма хетта салоӏаш ха дӏаяхьа аьттув хилар наьха. Кагирхой гӏулакхех йолча Комитета «Кагирхойи бераши» яхача къаман проектага, «Къонабарий моттиг» яхача федеральни программага гӏолла дӏахьош болх бар из.
