МагӀалбикхоша ГӀалгӀайче гойтаргья, «КЭС-БАСКЕТ» яхача баскетбола лиге
МагӀалбикерча №18 йолча «КЭС-БАСКЕТ» яхача баскетбола лиган командо дикача толамашца йистеяьккхар ишкола баскетбола лига, Ерригроссен моттигера яхьаш. Геттара тӀатеӀа къахьегарах, цар хьалхара моттиг яьккхар, цул совгӀа СКФО дӀахьоргйолча яхьашка дакъа лаца таро а хилар.
«ГӀалгӀайче толашагӀчарех цхьа команда лархӀа йиш йолаш бола толам боаккх цо хӀанз кхозлагӀа. Иштта дика яхьий чаккхе е цун таро хул, хӀаравар ше-ший моттиг йовзаш, говзал лакхъяра тӀакхувш, спортивни майдан тӀа баьлча де дезачун хьисап долаш хиларах. ХӀаьта царех ишколан баскетбола дика говзанчаш баьр ва тренер Албохчанаькъан Ӏумар», - аьлар «Сердало» газетага командах дог лазаш хиннараша.
«КЭС-БАСКЕТ» яха ишкола баскетбольни лига проект вӀашагӀъеллай Пермски мехка, цунна, дукха ца говш, терко тӀаяхийтар дукхача дешархоша. Из хьакхоллара керттера бахьан дар кхувш йоагӀа тӀехье цу юкъеяккхар, уж физически культура, спорта юкъе хилийтар. Баскетбол цӀаьхха хержа яцар: цу спорта даькъ тӀа Ӏомаю накъайоалаш йола оамалаш, сиха, кадай хилар, моллагӀча хӀаманца бала болаш, шийна ховш дар декъара кийча волаш хилар.
Ше болх беча юкъа, «КЭС-БАСКЕТ» яха проект, вахара оагӀув хинна дӀаэттай. Цо дукхача ГӀалгӀайчен дешархошта новкъостал даьд, шоай спортивни таронаш гучаяха, керда новкъостий бовза, командаца цхьана хила.
