Района кулгалхо волча Кхузнаькъан Къамбулата белгалдир, шоаш дIамелдихьача белхех дар, иштта хIанзчул тIехьагIа кхоачашде лерхIарех а. «Экономически хьал аттадарех хиннадеце а, Даьла къахетаманца дуккха дикаш кхолла аьттув баьннаб. Из деррига а вIаштIехьадаьннад, цхьа барт кхеташ болх дIабахьарах. Вайх хIаравар района хьалах дог лазаш, цун хьал тоадергдараш юкъе кхувлаш дIаваха веза. Ишттача наькъаца мара кхоачалац доккхача хувцамашка, бахархой хьал тоадергдолча дикашка.

Тахан, майрра ала йиш я вай цхьана, массане дIабихьача къахьегамах района культурни вахаран хьал, спортаца дувзаденнараш, дешара гIулакх хоалуш меттаденад аьнна. Иштта дIадаха деза вай къахьегамах, духьала нийслуча халонех ца кхераш. Вайна хьалхашка латта керттерадар — района бахархой гIулакх, ма хулла, тоадар! Аьттув хургба вай къамах дог лазарца болх дIахьош хуле», — аьлар ший къамаьла юкъе, района вахарах дог лазаш волча, Кхузнаькъан Къамбулата.