Хьаькъала белгало хилар
ГӏалгӀай мехкарча Малсаганаькъан Адамах, Сенеже дӀахьоча семинар-кхетачен кхелахо хилар
Сенеже чакхъяьлар Ерригроссийски семинар-кхетаче, из яр кагирхой политика дегӀайоалаяра хетаяь. Дика вовзаш вола юкъарлон болхло Малсаганаькъан Адам вийхар цу кхетачене федеральни кхелахо санна. «Сердало» газета болхлочунца къамаьл деш, цо белгалдир цу гӏулакхацара керттердар.
– Адам, фу лу цу семинаро, хьога хаьттача, мехка?
– Семинар йолаш вӀашагӀтехар 150 говзанча, уж бар 89 моттигера баьхка. Кхаь дийнахьа доакъашхошта дийцар мишта, кийчде деза дехараш, къаман проекта чудоагӀаш, моттигашка субсидеш эцаргдолаш. 2026 шера тушола бетта 2-ча денгара бекарга бетта 16-ча денга кхаччалца, РФ моттигашка «Мехко кагирхошта» яха программа дегӀайоалаяра дехараш дӀаэцаш да. Семинар хилар бахьан долаш, хьалхалаттарий таро хургья шоашта ховш дар дикагӀа довза, иштта ахчаш хьаэца.
– МалагӀа вахара оагӏонаш йийцар семинар-кхетаче?
– Хьалхарча аргӀагӏа – из дехарашта еш йола кийчо яр. Дӏахо оаха «Мехко кагирхошта» яха программа кхоачашъяра кердадараш юкъедоах. Керттера терко тӀаяхийтар кагирхой политика дегӀайоалаяра, иштта цу лоархӀамеча яхье дакъа лацара дехараш дика хилийтара. Теркама юкъе дар кагирхой политикан болх тоабар, кагирхой хаттараш довзар.
– Кхоачашхиларий Хьа сатувсар цу кхетачене?
– Сона дагадаьллар дар, сайна ховш дар хьаьшашта дӀадалар. Со цига бийхача наха юкъе вар. Тхох хӀаране, ше-ший болх бувцаш, къамаьл дир. Сайрийна оаха, кагирхошта кердадараш хьакхолла новкъостал деш, тхоайла къаьстта дола хьехамаш дӀахьора. ЛаьрхӀар кхоачашхилар ала йиш йолаш ва со, хӀана аьлча берригаш раьза болаш бар.
