Инвестицеш
«Магас» аэропорт Wӏldberrӏes доалахьа хургья
Россе эггара хьалхарча турпала, Осканаькъан Сулумбика цӏи лелаеш йола «Магас» аэропорт кхывола да волаш я хӏанзчул тӏехьагӏа. Аэропорта акцей контрольни пакет ийцар 425 миллион сомах Wӏldberrӏes оагӏон чуйодаш йолча «Апр-Сити/ТВД» компане. Цу гӏулакха аэропорта хьал дикка тоадарал совгӏа, вай мехкарча ганза хьал а аттача доаккхаргда, хӏана аьлча аэропорта гӏулакхашта мехкара дӏаихар дукха ахча дар. Из хоам «Сердалога» бир Мехкадаь, Паччахьалкхен зарбан болх лелабераша. «Аэропорта, иштта мехкарча экономикан хьал тоадара тӏехьа лоархӏаме гӏа ба тахан баьккхар.
«Инвестора доалахьа аэропорт дӏаяларца, хӏара шера цун гӏулакхашта мехкара дӏатӏаиха 100 миллион совгӏа рузкъа мехка дусаргда. Юххьанца оттабаь мах 250 миллион сом бар аэропортах, бакъда, аукционе инвестораш цунга кхачар геттара дезаш хиларо 425 миллион сомага кхоачаш айбалийтар мах. Ши компани яр дакъа лоацаш хиннараш. Хьаийца ахча мехкара лоархӏаме проекташ йоаржаеш дӏадохийтаргда», - белгалдир Келаматанаькъан Махьмуд-ӏаьлас. Кердача даь рузкъанца аэропорта хьал таханарча ханага хьежача хила дезача тайпара тоаде, дукха хувцамаш де, тӏалаттача наха паргӏатагӏа, дикагӏа хургдолча тайпара цу чура хьал хьаоттаде аьттув ба. Цул совгӏа, теркалде деза, дикка тоаяь яьнна, пайда хьабе йолаелча, цун тӏера хьаухаш йола йоал мехка ганза хьал лакхдеш хургйолга.
«Wӏldberrӏes хьаллоацаш, кхы а керда рейсаш хьаелла тарлу аэропорте. Вай мехкарча туризма пайда беш, наха болх бе моттигаш луш, «Магаса» хьал дикка меттадоаладеш хургда из. 2021-ча шера къамашта юкъера аэропорт я, аьнна, соцам баь из моттиг, таханарча хано дӏадеххача тайпара, тоаенна дӏаотта езаш я мехка цох боккха пайда хулаш, хӏаьта мехкарча Паччахьалкхено лаьрхӏараш кхоачашхилийтара тӏехьа массадолча тайпара гӏо дергда», - белгалдир Мехкадас.
