«Тӏема операце юкъе дакъа лоацаш болча къонгий дезалашта гӏо лоаттадеш, эшачунга хьожаш я Комитет. Укх оагӏонца дӏабахьа безар боккха, лоархӏаме болх ба. Бӏухой дезалий вахарера кхоачамбоацараш юстардахара тӏехьа, царна юридически, психологически оагӏонцара гӏо лоаттадеш, уж хьаллоацаш болх лоаттабе беза», - дийцар «Сердалога» Эсамарзанаькъан ӏалаудина.

КСВО кулгалде ӏалаудин оттавар чӏоагӏа раьза болаш хьаллаьцар вай республике, хӏана аьлча моллагӏа чоалхане хӏама дашха, хила деззача тайпара тоаде хьаькъал долаш, хьинаре къахьегаш; Даьхенах, мехка латтача хӏамах дог лазаш саг ше волга хьагойтад цо. Наха вовзаш, тешаме, моллагӏа хӏама вӏашагӏдолла аьттув болаш волча ӏалаудина кердача, дикагӏча тайпара хьаоттабергба Комитета болх.

Ветеранашца ювзаеннача моттигий болхлой, иштта юкъарлен оагӏонцарча балха къахьегамхой дог тийша ба, Эсамарзанаькъан ӏалаудин гӏо эшаш барашта йоаггӏаш йола терко лоаттаеш, шийна тӏадаьхка декхараш дизза кхоачашдеш дӏачакхваргхиларах. Юкъарлен оагӏонцарча моттигашка дукха хана денз къахьегаш хьавоагӏаш, моллагӏа чоалхане хаттараш дашха, шийна гонахьа къахьега ловш, дог лазаш бола нах гулбе, халадар аттача даккха, наха эшар, дезар фуд тахка дика ховш ва из саг.

Тахан ӏалаудин массехк моттиге къахьегаш хьавоагӏа. Магасерча администраце юкъарлен оагӏонцарча балхах йолча моттига кулгал деш; культурах, дешарах, ӏилмах йолча мехкарча Юкъарлен палата комиссена хьалха латташ, иштта дешареи ӏилмани гӏулакхех йолча министерствон Юкъарлен совета кулгал деш, болх дӏахьош ва тахан ӏалаудин.

Белгалде деза, царех хӏара моттиг дикка къахьега дезаш, моллагӏча оагӏонцарча нахаца бувзаме вала, боаггӏача боараме къамаьл дӏадахьа, ше визза болхло волга дӏахайта дезаш йолга. Дуккхача шерашка денз балха тӏа волаш, ший къаман юкъера гӏулакхаш, кхоачамбоацараш дика довзаш, ала деззача нийсагӏа хургдар хьалхадаккха, юкъеоттаде ховш волча ӏалаудина бехктокхаме дӏахьоргда аьнна хет уж декхараш.

Къаман юкъера ӏадаташ, бахархой оамалаш керте лоацаш, моллагӏча тоабан юкъе тешаме новкъост хинна дӏаотта ховш хиннав ӏалаудин. Цун гонахьарча наха белгалдечох, массанеца та, мотт лаха ловш, моллагӏа декхараш чоалхане да аьнна дӏа ца тотташ, шийна дӏатӏаэцаш саг ва из. Хӏаьта цун таханарча балха тӏа из геттара лоархӏаме да.

Цун кхоачашде дезарашта юкъе да бӏухой дезалашта терко лоаттаяр, цар вахарера кхоачамбоацараш довзар, ветеранашта лаьрхӏа вахара оагӏонцара программаш йоаржаяр, паччахьалкхен моттигашца бувзаме волаш, уж юкъелоацаш ший болх дӏабахьар. Бахархоша, чӏоагӏа раьза болаш, тӏаийцар из цу моттиге кулгалде оттавар.

Белгалде деза, Эсамарзанаькъан ӏалаудин; СВО доакъашхой хьаллоацаш, царна гӏо лоаттадеча балха юкъе дакъа лоацаш; хьавоагӏаш волга. Украине дӏахьош йолча тӏема операце моттигашка гӏо лоаттадеш дакъа лацарах «Цхьана коталонга кхоачаргда вай» яхача премеца белгалваьв из.