Боча гӏулакх
«Пхьаматага» гӏолла гӏалгӏай культура дуненна йовзийташ я Хаматхананаькъан Аьсет
- Аьсет, хьо юриста професси караерзаяь я, дувцал тхога, кхолламцара безам мишта совбаьлар хьа дег чу? Мишта доладир ӏа из беркате гӏулакх?
- Ленташца догам даь сурт дайра сона цкъа, чӏоагӏа догьэттар са цун тара хӏама хьакхолла. Иштта йолаелар со сурташ хьаде, вай мехкара лоаман моттигаш гойта сай балхашка гӏолла. Тӏехьагӏо доладелар тӏормигаш…Эггара хьалхара тӏормиг хьабе са чам чуболлийтар российски дизайнер Арютунов Александр вар, нийсагӏа аьлча цо даь балхаш.
- Колламца къахьегаш нах хиннабий шун дезале кхы?
- Са нана, наьна-йиша хӏамаш тегаш хиннаб, цигара ба цу гӏулакхацара са чам.
- Мел ха еза хьона цхьа тӏормиг хьабеш?
-Цхьа тӏормиг вӏашагӏболла шиъ, кхоъ бутт безаш хул, балхага хьежжа да из. Эггара хьалха сай дег чу вӏашагӏдолл аз цун сурт, тӏаккха уйлашка чӏоагӏдийя, болх бе йолалу.
- Хьога хаьттача, кхалсага цхьа бизнес лелаяр таханарча ханаца малагӏа белгало гойташ да?
- Тахан сона гу, вай кхалнах тӏагӏертта бизнес лелаеш, къахьега ловш болга. Ма дарра аьлча, дика аьттув а боал вай кхалнаьха тахан.
- Пхьамат ((Pkhamat) яха къердам мел гарга ба хьа дега?
- Пхамат безнес-проект яц. Хӏара сага дегах хьокхабала беза лоархӏаме оагӏув ба из, хӏама дагалоаттадар, лорадар да.
- Цунца бувзабенна мел бола болх ӏайха цхьанне лелабу ӏа тахан, мишта вӏаштӏехьдоал хьа ишколера болх лелабешше, из а иштта дика хьаллаца?
- Деррига дер со-се я, проект чакхъяллалца. Шоана гуш мел бола болх са кулгаша хьабаь ба , оттадаьча йоазонгара дӏа мел ийккхар. Вӏалла хало йоацаш аьттув боал са тахан шаккха болх дӏабахьа.
- Гӏалгӏай культура дерригача дуненна дӏайовзийташ да хьа балхаш, дика хетар массахана хьо доккхача толамашка кхоачаш хилча. Керда болх маца арабаргба?
- Рамадан цӏайна хетаяьча фестивале дакъа лаца лаьрхӏа я со лайчилла бетта. ӏан шоллагӏча бетта Касабланка яхача шахьаре (Марокко) дӏабахьа лерхӏача Халкъашта юкъерча гойтаме гӏоргья со, Дала аьннадале. Ах шу массаза доал арахец аз керда хӏамаш. Маӏача наха лаьрхӏа хӏамаш хьае безам болаш я со.
- Тахан хьай дезала малагӏа гӏулакхаш довзийта гӏерт хьо?
-Гӏалгӏай къаман эздий ӏадаташ, оамалаш лоархӏаш болаш кхебе гӏерт со уж.
- Дагалаттар кхоачашдара тӏехьа малагӏа гӏа баккха беза, хьога хаьттача?
- Ший аьттув баргхиларах дог тийша волаш къахьега деза тӏатеӏӏа, болх Аллахӏа дӏатӏабилла, Цунгара гӏо дехаш.
- Хьай тика дикка дӏашеръе безам бий хьа, «Пхьамат» дерригача дунен моттигашка йовзаш хургйолаш?
- Сай цӏагӏа я са пхьоалле. «Vaytӏkа» («Вай тика») яхача моттиге эца йиш я са хӏамаш. Интернете гӏолла, дунен тайп-тайпарча наха йовзаш, дӏаийеш я уж тахан. Тхоай доалахьа хургйолаш цхьа моттиг хьаелла безам болаш да тхо.
- Аьсет, баркал хьона тха мел дола хаттараш доашхаш ха дӏаяхьарах. Аьттув хилба хьа цу гӏулакхаца, дагалаттар кхоачашхулаш яхийла хьо!
