Оарц дехаш, кхайкар!
Вай мехка хьакхаьчача Палестинерча наха Россега дехар ду, шоай дезалех дӀакхета гӀо де шоашта, яхаш
Сиха оарцагӀа ухача лорий машен латт, «Асса» гостиница наӀарга. Холле гулбеннаб миннаца болхлой, роспотребнадзор, МЧС, МВД къахьегамхой. ПхелагӀча гӀата тӀара хьахоз берий гӀар, цхьа теӀа бувца Ӏарбий мотт. «ХӀанз мара хьакхачанза ба уж. Наькъа боагӀаш этта салаӀа дезаш ба»,- аьлар тхога регистратуре. Духьале ца еш хьалтӀадалийтар тхо, Палестинера кхаьча мискаш болча. Дукха ха йоацаш укхаза Ӏеш хилар Запорожски областера беха нах. Иштта, тӀемах байдда, кхаьчабар уж а укхаза. Тахан укхаза безаш тӀаийцар Газера нах. Паччахьалкхе йитац Палестина хила.
НаӀараш йийлла латтача номере мара дӀачудолхацар тхо. Боккхийбараш а, бераш а цхьа безаме, сабаре дар, иззал хала, гаьнара никъ ловш, эзача Ӏазапах байдда баьхкабале а. Цу тӀа хиджаб ювхаш со хиларо а дикагӀа хьадоастар цар дегаш. Мотт кхетацабар дар хала… Бакъда, ингалсий мотт ховш йола йиӀиг кораяь, цо аттачахьа даьккхар тха гӀулакх, аьттув хилар, йишеи вошеи долча Рамаданаца, Раисайца къамаьл де. Рамадана бархӀ бери цӀен-нанеи йисай гаьнарча мехка, Раисай – цӀен-даи ши бери. Египтерча аэропорте совцабаьб уж. Деррига каьхаташ доллашехь, Израилерча Ӏаьдало хьадехьабовлийтабац уж.
– Аэропорте цӀогӀа дийттар аз, малагӀа бахьан долаш тхо къоастаду оаш; тхои тха бераши тӀемца бувзам болаш ца хилча,- дувц Рамадана. - «ХАМАСАца» тӀом беш да тхо йоах израильтянаша, хӀаьта тахан боабеш латтараш цхьаккха хӀаман бехке боаца нах ба. ЧӀоагӀа сатувс аз, шун газетага гӀолла Россе Ӏаьдалга тхоай дехар дӀакхачар, Россе тхоай дезалашца вӀашагӀакхетар».
Россе паччахьалкхенна баркал оалаш бар уж, Египтерча паччахьалкхенах дар, дош ца оалаш, дитар… Тха таржамхо хинна лаьтта Фатма ший ворхӀ бераца, несийца кхаьчар укхаза. Геттара зӀамига бер мархӀадоаллаш яр нус. 30 совгӀа бер да цига Ӏеш. Наьха нах ба ераш, аьнна, озалуш боацаш, белаш, удаш, кхестар уж. БоккхагӀчар хьаэца ца аьлча, хӀама хьаэцаш оамал яцар цар. Ӏарбий мотт ховчунца из бувца, сурташ даха кийча бар уж. ВорхӀ бера нана йола Фатма лор-физиотерапевт я. Ингалсий мотт иштта дика мичахьара Ӏомабаьб Ӏа аьлча, ший да ва из мотт хьехаш, аьлар цо. Из оагӀув хьаллоацаш къамаьл дича, Фатмайна хоза хетаргдолга ховш, хьоахадаьдар оаха… Массехк мотт ховш саг хилар-м таханарча хана цецвала хӀама дац.
- ХӀанз мара хьа мича кхаьчад тхо. КӀеззига яьхача ховргда хьона, аз эрсий мотт мишта шаьра бувц.
- ЧӀоагӀа теша лов сона цу хӀамах! Айса Ӏомабаь ингалсий мотт сона бицбеннаб, бувцаш цахиларах. Хьо эрсий мотт Ӏомабаь яьлча, ма хетта къамаьл дергда-кх вай шинне.
Россе хьачувайтавац Фатмай мар а.
- Из хьадехьа цавалийтара бахьан хац сона! Шоай безам бар мара дехьавалийтац израильтянаша. Са дего кхета ца еш харцо я из. ЧӀоагӀа сатувс цу мискаша, Россе паччахьалкхено шоай дезалех дӀакхета новкъостал дарга. Шоай дагалаттача дикашка кхоачаболба уж Дала!
