Унахцӏена вахар - керттерча моттиге
Къаман проекташка гӏолла, спорта хьал тоадеш ба Илдарха-Гӏалий тӏа
Хӏанзчул ворхӏ шу хьалха цхьа ФОК, цхьа стадион мара яцар шахьаре; спортаца бувзам лелаберашта. Спортацара гӏулакх боаггӏача боараме тоадара тӏехьа боккха эшам бар из. Хӏанзчул 20 шу хьалха шоай болх дӏаболабаь моттигаш я уж, цул совгӏа вӏаший йисте а я. Цох кхетаду вай, спортаца массахана бувзам лелабе ловрашта ма хетта аьттув боацилга. Хӏаьта цу шахьарера дукха кагирхой, бераш спорта моттигашка аха ловш дар.
Бакъда, тахан беркатеча къаман проекташка гӏолла дукха хувцамаш де аьттув ба мехка, иштта Илдарха-Гӏалий тӏа а. 2019-ча шера денз, «Спорт - вахара оагӏув» яхача къаман проектага гӏолла, Заречни оалача ураме ФОК хьалъяьй; Кирова цӏерагӏча ураме воркаут-доазув дола зӏамига стадион яьй; Заводской оалача урам тӏа федеральни проектага гӏолла цхьаькха стадион хьаелла аьттув баьннаб.
Шахьаре спорта моттиг хьаелла ловш къахьегаш ба тахан хьакимаш. 2027-ча шера «Спорт - вахара оагӏув» яхача къаман проектага гӏолла, шахьара 1-ча даькъ тӏа, наьк де моттиг йолаш, ФОК хьалъе лерхӏ. Цу гӏулакха лаьрхӏа ЖБИ йолчахьа 1,5 гектар йола лаьттан доазув къоастадаьд. Шахьарерча администраце белгалдечох, спорта залаш дукхагӏа мел хул моттигера спортсменаш а дукхагӏа хургба. Цунга хьежжа ма могга низ тӏабохийташ тоаде лерхӏ из гӏулакх.
Спортаца бувзам лелабе аьттув луш йола моттигаш хилча, дукхагӏа адам тӏадаржаргда спорта, шоай дегӏа хьал меттадоаладе ловш. Хӏаьта шоаш бахача моттига гаьна йоацаш уж моттигаш хиларо дикка аттачахьа доаккх бахархой хьал. Бераш, кагирхой, боккхийбараш спорт хьаллацара тӏахьехаш боккха болх ба мехка боаржабер. Вай массане кхетаде деза, вахар унахцӏена дӏадахьа, дегӏа хьал лерттӏа хилийта, кадай, хьинаре долаш даха безам бале; спорт эггара керттерча моттиге оттае езилга.
