Даьхен гӀулакха ураоттар хержача Чопанаькъан Адама вахарах дувца лов тхона тахан. Цхьан хана, вай дерригаш санна вахара денош дӀахьош саг вар из; бакъда, цхьан дийнахьа ший дег чу нигат чӀоагӀдаь, къаман накъавоалаш, наха гӀо деш вола саг хила лаьрхӀа кердача наькъ тӀа майрра гӀа баьккхар цо.

МЧС болхло волаш, цӀи яьннача оарцагӀа ухаш Адам хьавоагӀа 13 шу совгӀа ха я. 2024-ча шера Украинерча тӀема операце юкъе дакъа лаца араваьлар из. Белгалде деза, 2022-ча шера денз, цун воша СВО бӀухо волаш хьавоагӀилга. ТӀема аренашкара ди, бийса ца къоастадеш; фийла, кийча хила веза денош дӀадоладелар Адама вахаре.

ЦӀенга сатувсар, саготдора, мехкацарча безамах хьегар, бакъда тӀом яхача дешо из деррига ӀотоӀаду. Вай къаман юкъе долаш да-кх, гӀо дар, гонахьарча наха тешаме новкъост хилар, хьай мел бола низ Ӏобилла ийшача новкъостал дар эггара лоархӀамеча гӀулакхех долга.

Халонаша саг ше ма варра хьавовзийт. БӀухошта везавелар дог майра, денал долаш вола гӀалгӀай салте, тешаме тӀема новкъост из волга теркалдир цар, тӀема аренашка лелаш. Шозза лозаваь, хьоа човхабаьрех ва Адам. БӀаьстен денош хьаотташехь, мехка ваьлар из, СВО доакъашхо хулаш яьча чӀоагӀон ха чакхъяьнна.

Ший республике наха гӀо деш, накъавоалаш, дӀахохьош ва из къахьегамах бизза бола вахара никъ. Ала йиш яц, Адам хувцавеннав аьнна, бакъда, тӀема аренашка доаллар бӀаргадайна; маьршача, паргӀата долча вахара хам хӀанз дикагӀа бовз цунна, дукха хӀамаш тахан дикагӀа кхетаду.

«Турпала никъ» яхача программе дакъа лацаро керда, толашагӀа дола наькъаш хьаделларгда Адама вахаре, балха тӀа. Деналах визза волаш, къаман яхь лораеш, наха накъавала хьожаш хьавоагӀача цун вахаре дукха да къонабараша масал эца мегаргдараш. Беркате, аьттув болаш, иразе хилба цун вахара никъ дӀахо а!