Цу хана денз, дукха хувцамаш хилар вахаре… Кердача вахарга дӏаӏамаш воагӏа тӏема операце ветеран. Ийккхача мино хийцар цун деррига вахар; бакъда, Даьлагара из вехаш, дуӏа дераша, везараша, лоархӏараша цхьаккха хӏамах дог диллийтац.

Вайна ма харра, дӏадахача шера модульни протез тоае аьнна 1 миллилон ахчах латта сертификат делар цунна. «Даьхен лорбой» яхача ганза болхлой оарцагӏбаьнна, эшар кхы а хьатӏаделар ветерана. Массехк оагӏонца дӏабахьа безаш болх ба из.

Лораша яхачох, цун вахара хьал аттачахьа доаккхаш хургба из. Белгалде деза, «Хьаькъал дола цӏа» яхача оагӏонца, ший цӏагӏа лела цунна аттагӏа хургдолаш хувцамаш даьлга.

Тайп-тайпара датчикаш, «хьаькъал» дола колонка, лувжаш доаца кӏувсилгаш, робот-домбоахарг, иштта кхыдараш Адама йоккха атто еш да, вӏалла ца хийттача тайпара.

«Халонех чакхбаьннача ветеранашта массахана терко лоаттаяр - вай декхар да. Тӏема операце докъашхой вахара хьал ма могга аттачахьа доаккха дарба лоаттаде, иштта кхыдола эшараш ханнахьа хилийта гӏерт тхо, низ дӏа ма кхоачча», - дийцар тха газетага Оздой Муслима.

Сертификата тӏа эшаш дола ахча хьатӏадалар а тахан вай турпала хьал аттача даккхар да.

Даьхен хӏама лораде арабаьннарашта терко лоаттаеш, царна эшаш долча хӏаманца гӏо лоаттаде кийча долаш, хила деза вай массахана.