«Видновские вести» яхача газета тIа, иштта дIадоладу журналиста ший къамаьл. — «Муттхьал бетта шоллагIа ди дар лаьттар. Ишколера хIамаш чуйоахка ший тIормиг цIагIа Iо а оттабаь, Тимоховски пруд болча ваха сихвелар Мухьмад. Цига гулденна, цун довзаш бераш а дар. БIарга цIазам тохача юкъа хьахилар из хатар. Ма даггара, чуийна бераш ловзаш доахкача юкъа, царна юкъера цхьа кIаьнк, цIаьхха, пруда берда тIара лайжа шийлача хи чу вежар. Сов сиха хьахиннача цу хатаро унзара даьха бераш, фу дича бакъахьа да ца ховш латташ, Мухьмад, ше ма водда, кIаьнка гIо де оарцагIа вахар. ДIахо дувц зIамигача турпалхочо — «Хи чу вежача кIаьнка IокIала ца ваха гIерташ, ма даггара, цу лакхе яда дахчаш хьалувцар.

Ше аравоалалургволаш вацар из! Сов кхеравенна, ма даггара, гIо дехаш цIогIа деттар цо. Со, цун гаьна а воацаш, лагIашта юхе латтар. Кхерам яха дош, са керта чу дацар цу хана. Из кIалхара ваккхар мара, кхы уйла яцар са. Се Iочувожаргмавий аьнна, вIалла, юхаозавала йиш йолаш дацар этта хьал. Кулг Iочукховдадаь хьаараозавир аз из. Дего, ма даггара, яхар цаI дар — «Хин IокIала вахийта йиш яц хьа из!»

Тахан цу зIамигача кIаьнка, ший дегIацара гойта доккха гIулакх, вайна доккхийчарна а массал да. Ший вахара уйла ца еш, сага оарцагIваха денал эш. ЦIаьхха, иштта хатар иккхача хье ца луш гIо де хьовзар, ше мо вола саг кIалхарваккха оттар, хами махи баь варгвоаца дика я. Иштта лаьрхIар из гIулакх- Ленински округа администрацен кулгалхочун гIонча йолча Квасникова Татьянас, Московски областерча МЧС болхло волча Джкин Сергея, пхье спортивни кхуврча кулгалдеча Авдеев Григоре. Ялхарой Мухьмада спортивни кийчо еча, «Орленок» яхача, клубе баьхка хилар уж берригаш. Грамоташи, баркал оалаш дола каьхаташи денна, доккхача дешаца цо гойта майрал, денал дийцар цар. «Видное-ТВ» яхача телеканала журналисташа бахархошка дийцар, Мухьмада карагIдаьнна гIулакх. Иштта, из доккха гIулакх шоай дешархошта дийцар «Видновские вести» яхача газета корреспонденташа а.

Цхьана вIашагIкхийтта, уж, баьхка хилар Мухьмад волча кхуврче. Шоашкара грамота енна, мерзача даарашца, хозача къамаьлашца, баркалца вай зIамигача турпалхочун дог хьаьста бахар уж. Шийна кховдадаь мерза даараш, деррига бераш хьагулдаь, дийкъар Мухьмада.

Ишттача хьехамца кхеву кIаьнк, тахан, вахара наькъа тIа воаккхаш. Мухьмад ухача клуба кулгалдеча Гаджимурадов Гаджимурада дийцар: «Бераш, духхьала, низа чIоагIа хилара тIехьа кхедаь Iац со! ЛоархIаме да, цар дега хьал дикача, беркатеча хIаман тIехьа уж кхебар, массе хана из чулоацаш бола хьехам царна лоаттабар. Дика дари, во дари къоастаде Iомабу оаха уж зIамига болча хана денз. ХIанз цар дегашка чIоагIдаьр, массе хана цар дегIаца дахаргда. Цунга хьежжа, цхьа хала, гIо эшаш моттиг цIаьхха нийсъелча шоай оарцагIабаха безалга хов царна». Ше язъяьча статья тIа Филатова Викторияс юкъедоаладу цIихезача тренера Ионов Федора дешаш. Тахан «Орленок» яхача клубе ухача берашца, болх дIахьош ва из. — «Мухьмад ший тайпара кIаьнк волаш хьавоагIа юххьанца денз. Эггара хьалхарчарца дIаелар цо «желтый пояс» оалача оагIонцара экзамен.

Яхьашка доккха денал хьокхаш чакхвувлаш хиннав из массе хана, дуккхаза котало кхихьарех а ва тхона. ШоллагIа моттиг ше яьккхача, ца говш цун тIехьа, хьалхара меттиг йоаккхаш хьавенав. Шийна хьалхашка ше Iооттадаь декхар кхоачашде хьожаш ва из, яьннача ханага хьежжа доацаш! Тренировкаш тIехьа ший группе санна, боккхагIчар гIуппе а дIакхухь цо. Дог дика кIаьнк ва Мухьмад! Гуш да, хоза хьехам луш, дикадар хьалхадоахаш кхеваьлга. Кхы дикагIа хила йиш йоацаш дика воI ва ше, варий, тха бочагIа вола спортсмен а ва!»

ЗIамигача турпалхочун дег чу тахан кхедеш цхьа доккха дика да. Кхийна ваьлча цIера кхерамзленца ювзаенна професси харжа лаьрхIа ва из. ЧIоагIа лов Мухьмада, цIи йоеш болча, болхлошта юкъе хила. Тахан вайна ха йиш яц, воккха хилча цун уйлаш хувцалургйий. Кхыбола вахара никъ харжа мег цо... Бакъда, цаI-м белгал да тахан! Сага гIо эшача метте, оарц дехаш нийслой уйла ца еш, хье ца луш новкъостал де оттаргварех ва Ялхарой Мухьмад! Сага оагIув хьаллацара тIехьа, цох дика зIамига саг хургволга вайна массанена гуш да, хIанзехьа. Из кхеваьраш тахан цох доаккхал де йиш йолаш ба - боккъонца вола эздий, сийдола, деналца вола къонах ва, кхоана цар вахар сийрдадаьккха хьалъоттаргвар!