Дарить тепло души
Могашал эшаеннача берашта концерт делар къаман кхоллама цIен болхлоша
Благотворительный концерт «С любовью к мамам!» состоялся в Центре непрерывного образования для детей с ограниченными возможностями здоровья — республиканском образовательном учреждении, расположенном в сельском поселении Нижние Ачалуки. Организатором мероприятия, приуроченного к Международному женскому дню 8 Марта, выступил Дом народного творчества Ингушетии им. заслуженной артистки России К.А. Евлоевой.
«Цу моттигерча болхлошца цхьана вIаштIехьдаьккха дIахьош дар из вIашагIкхетар. Цига Iеш долча, начIал долча берий аьттув хилар шоашта могар хьокха. Тхона чIоагIа лоархIаме да, дегIа могашал эшаенна бераш а цхьацца моттигашка дакъа лоацаш хилар. Цу хIаман тIехьа болх дIакхухь оаха.
«Дикал йоаржаяр» яха кулгашца цхьацца хIамаш хьаккхоллаш йола пхьоалле хьайийллай оаха цига. Цу балха тIа цIихеза говзанча вола Чуранаькъан Ювсап ва берашца болх бер», — дийцар тхога РДНТ кулгал деш йолча Котанаькъан Марета. Концертага хьажа гулбеннабар берий ноаной, цу чура лораш, иштта кхыбараш а.
«Ираз долаш хилда шун вахара денош! ДIадолалуш дола бIаьстан денош беркат дахьаш доагIалда! Дала аьттув боаккхалба вай массане дикача, пайдане хургдолча хIаман тIехьа! Могаш, маьрша хилда вай хьамсара бераш. Сийрда хилда цар вахара наькъаш!» — ишттача дешашца хьайийллар из моттиг кхоллама цIен исбахьален балха кулгалхо йолча АбдурзаковгIар Аьсета.
Шоай начIал дIакхоачар хьокхаш дар бераш. ПхелагIча классе ягIача Къамурзой Раянас «Нана» яха илли аьлар, кхыдолча бераша «Ноаношта совгIат» яха программа гойтар.
ЗIамига артисташ, тIоараш детташ, хозача дешашца тIаийцар кIалхарча наха. Дахчан пандар лекхар «ТIаргам» яхача ансамбла доакъашхо волча Овшанаькъан Гафура. Цу ансамблерча Батыранаькъан Хьавас ше Iомадаьр гойтар гулбеннарашта. Эбарга-Юртарча культуран цIагIа цхьацца говзалаш Iомаеш болча Хьаьшанаькъан Далияси Иманаси иллеш аьлар.
«Сийг» яхача ансамла доакъашхой болча Янданаькъан Расулеи Имагожанаькъан Рабияси геттара чIоагIа гIадбигар гулбеннараш. ГIалгIай халхар дир цар цига. ЦIихеза артист вола Оздой Адам сцена тIа валаро дегаш ураовттадир наьха. ДегIа могашал эшаеннача берашта чIоагIа хоза хетар шоаш теркалбаь.
— Сона дика хетар, каст-каста укхаза иштта нах ухаре. Сакъердаме дар тахан чIоагIа, — аьлар 14 шу даьннача Горчханнаькъан Тимура. Осминаькъан Сулеймана хоза хетар гIалгIай халхар. Юкъевала чам бенна, хьайзар из ше а. Лакха говзал йолча нахага хьежаш, берашта цхьа тамашийна хет. Цхьадараш Iомаде ловш хул уж.
«Тхоай берий дегаш гIоздаьхача наха доккха баркал оал оаха. Шоаш теркалбар чIоагIа эш могашал эшаеннарашта. Цхьа зIаммига дикахетар хилча а гIадболх уж», — аьлар дегIа могашал эшаеннача берий цIен кулгалхочун гIонча йолча Къоастой Марема. РДНТ болхлоша берашта денадар цIихезача этнографа Мерешканаькъан Султана «ГIалгIай ловзараши ловзара куцаши» яха книжкаш, сурташ вIашагIдехкаш дола дакъилгаш.
«Тха ерригача тоабангара доккха баркал ала лов шоана, иштта къахьегарах, тха берашта совгIаташ дарах! Цу берий дог хьастар боккхача маьхе да. Даьла раьза волча хIаман тIехьа аьттув болаш дахалда шо! — аьлар цу цIен кулгал деш волча ЦIечой Ахьмада. — Ноаношка аргдар аз, кхоллама цIено тхоца бувзам лелабу массахана.
Кулгаца цхьацца хIамаш хьаеш йола пхьоалле хьайийллай вайцига, цар гIо деш. Цу балха тIа гIорваьнна къахьегаш вола говзанча ва вай берашца ха дIахьор. ДегIа могашал эшаеннача берашта оаш деш дола дика гIулакх мах баь варгвоацаш да».
Сага дог хьастар доккха дика да! ХIаьта могаш доацача берий дог деладар, маьл хургболаш хIама да. Дуккха дикаш кхолла низ лулба вайна Дала! ХIара вIашагIкхетар беркате хургдолча тайпара чакхдалда.
