Лела атта, паргӀата хургбола никъ ца беш, бисар цу хана. Цхьа бахьан жагӀа тессача моттигашка гӀолла чакхбувлаш лелар нах. Дала къахетам баь, цхьа юкъ яьлча, Кхоартой оалача урама дӀатӀаоттача новкъа асфальт биллар. Эггара юхерча ишкола тӀабода никъ, шиъ-кхоъ километр ба. Иштта гаьна никъ беш нах лела моттиг, дика тоабаь никъ болаш, моллагӀа йолча машена дӀа-хьа яха атта долаш, хила езаш яр... Бакъда из гаьна да, тахан хьагуча суртах. Из тайпара, дега хала йола моттиг отт, болх беш баьхкачар шоай декхараш дизза кхоачаш ца дича, дог лазаш къахьегаш ца хилча. КӀоагех хьалбиза бола из никъ, ши шу хьалха дӀа-хьа аха хала долаш бар. ХӀоалчагӀа е цӀай долаш хилча, цхьа бахьан дӀадукъ цхьадола кӀоагаш. Бакъда догӀа дийлхача, кӀоагаш юха гучадоал. Таханарча дийнахьа, шоаш хинначарел шерагӀа, дукхагӀа да уж. Сов дукха лаьттача догӀаша бохабаь никъ лакхера Ӏочутекхаб. Наькъа йистош, асфальт бохабеш, Ӏокхихьай догӀо. ДӀаходар кхы а халагӀа да... Болх бе дагахьа, цигара моттигаш аьхкай. Бера, воккхачунна дӀаваха геттара хала долча хьале латт из никъ хӀанз. Хотта, гӀум, лакха хьалъэтта латта йоархӀаш — деррига вӀашагӀъийна, цхьа ийрча сурт да цига. Шоай ханнахьа, догӀан хиш наькъа кӀалгӀолла чакхдувргдолаш турбаш яьхкаяларе, из хатар хургдацар тахан. Болх беш баьхкараш сагота хиннабац цу гӀулакха, мишта леларгба-хьогӀ укхаза гӀолла нах яха уйла, вӀалла гарга а йитаяц шоашта. Лаха эттача, бехкебараш дукха корабоагӀаргба вайна... Дукха каьхаташ, тайп-тайпара лоткъамаш, справкаш, кхыдараш дӀадолалургда, из тахка хьо эттача. Бакъда наха тахан дезар, бехкевар лехаш лелар дац, халача хьале бийрза латта никъ бокъолгахьа берзар да. Бахархошта деза, цу гӀулакха бехктокхамевар сомаваьнна, ший эхь оарцагӀдаьккха, чоалханеча хьале оттабаьча бахархой хьал аттачахьа даккхар. Вай тахан бувцар ба, 720 бера лаьрхӀа хьаяьча кердача ишкола тӀабода цаӀ мара боаца никъ. Ишкол болх бе дӀайолаялалехь, из моттиг тоа ца йойя, лерттӀа ишколе дӀааха аьттув хургбац берий. Кхоартой оалаш бола беррига урам тоабе дӀаболабала беза, цу гӀулакхах жоп дала дезараш! Тахан наха лела моттиг хьае еза цига! Доккхача дикашка, кердадарашка кхача гӀерташ, къахьега ловш да вай тахан. Цу моттиге бахача наха а лов, дикача хӀамашта юкъе хила, бакъда, никъ ба алар эхь долча гӀолла чакхбаьнна, шоай балха моттигашка уж дӀакхачалехь, дикка ха йовргья. Боккъал а, из де декхарийла бараш, эхь хийте, бехк хийте, тоабе из никъ!