- Малагӏа гулакх де дезаш хул хьо «Дикача наьха Клубе»?

- Со хӏанз дакъа лоацаш я «Тхо уллув да» яхача проекте. Цо новкъостал ду цхьаь бисача боккхийча наха. «Дикача наьха Клуб» царна новкъостал деш, а уж ший теркаме эцаш а я. Со дукха хиннай боккхий нах болча, царна эшаш йола молхаш хьош а, иштта дезача новкъостал деш а. Цхьабола къабенна кхалнах чӏоагӏа воча хьале хул, могаш боацаш, цхьаь биса. Царех цхьабарий кхыметтел цӏенош а дацар, уж бахаш бар вагончикашка; йӏоавхал, даар, цхьайолча хана кхыметтел мала хий доацаш. Сона чӏоагӏа къа хетар царех, со дӏахо а царна новкъостал деш я.

- Дукха ха йий хьо «Тхо уллув да» яхача проекте йола?

- Юххьанца со яр «Баьццара лампа» яхача проектаца, таро йоацача фусамашкара бераш дегӏадара новкъостал деш. Со цига йолча юкъа, сона дийцар «Тхо уллув да» яхача проектах, со цунна юкъеяха йиш йолаш хиларах. Со раьза хилар цига сайна фу карагӏдоал хьажа.

- Фуд хьона волонтёра балха даькъе дика хетар?

- Чӏоагӏа дика хет нах белабенна хилча, уж ираз долаш хилар лов сона. Сона се а хет ираз долаш, айса царна новкъостал деча хана. Нагахьа сага дог цӏена дале, цо массахана а дергда наха гӏо. Лоархӏаме да новкъостал эшаш вола саг хьаллацар: бераш, йоккха саг, воккха саг.

- Мишта деш ӏа ишколе?

- Со дика дешаш я, деша ловш а я.

- Мишта кхоаю хьо деррига де? Мукъа ха кӏезига хургья хьа.

- Деррига а аз хоза хеташ ду, цудухьа кхоаю со: деша а наха новкъостал де а.

- Фу де лерхӏ ӏа дӏахойодача хана?

- Се йоккха хилча, дӏахо а новкъостал де лаьрхӏад аз даарца, маларца кхоачам боацарашта; цхьаь бахача къоаношта, гаргара нах а е дезал а боацаш. Терко йоацаш бисарашта массанена а новкъостал де лерхӏ. Дӏахо а аз сай никъ дӏахьоргба «Дикача гӏулакхий Клубе», со ӏергья волонтёр йолаш, даим новкъостал дергда наха.

- Баркал, тха хаттарашта жоп даларах. Хьай наькъ тӏа аьттув балба хьа, цӏаккха юха ма ялалахь!