Низ болча кӏантий майда
Дзюдоист Хамхой Рахьим - Яндарен а ерригача ГӏалгӀайчен а курал
Дукха ха йоацаш, вай мехкахочо Хамхой Рахьима, дзюдох дунен хьалхале йолаш, толашагӏа йола моттиг яьккхар. Цун лоӀам, говзал дика масал да спорте котало мишта йоаккх хара. Цо хӀанз Европа чемпионате, Спартакиаде, иштта Санкт-Петербурге, Тбилисе дӀайихьача яхьашка доахараш лакхара совгӀаташ да.
Болгарерча столице Софи оалача шахьаре ГӀалгӀайчен дзюдоиста кхоачам болаш сиха эшабир Узбекистанера, Казахстанера шийца латаш хинна 66 кг дозал дола спортсменаш.
Белгалде дезаш да, Хамхочо кийчо йир дунен боарам бола къовсам дӀабахьа Яндарерча «Чемпион» яхача Физкультурно-унахцӀенон комплексе. Цига луш бола хьехам кхыча, дукха толамаш даьхача спортклубашта тӀехьабусаш бац. Цу гӏулакха юкъе доккха дакъа денад тренера Цӏечой Селима.
«Укхаза духхьал ӏомабалара болх дӀабихьа Ӏац, чӀоагӀлу сага оамал, ше лаьрхӀар кхоачашдара тӀакхувш хул. Хӏара денна кӀувса тӀа, зале, спорта наькъ тӀа хилар - из лакхаленашка, майдилгашка, коталонашка вугаш бола никъ ба», - йоах Селима.
Хӏара кердача тӀахьехамо лу сага вахара говзал, лоӏам оарцагӏбаьккха духьалъотталуш хилар, во-дика къоастадара бӏаргаш хьадел. Дунен хьалхален яхьаш дӀахьош, Хамхочоа тоъаш хилар коталонга кхача безам хилар а физически низ а, ший спорта даькъ тӀа толам баккха чӏоагӏвалар.
«Чемпион» яхача ФОКа кулгалхочо Чӏасанаькъан Илеза яхачох, могаш а низ болаш а тӀехье кхеяр, вай юкъара декхар да. Цудухьа тхо тахан дӀахо а дика хьалаш хьакхолла дезаш да, физически культура дегӀакхувлара массадолча даькъ тӀа.
