1992-1999 шераш цу йиӀига дӀадихьар Шолжа-Гӏалий тӀа. Цхьацца бахьанаш нийсдаларах, спорта гӀулакх цо дӀаходихьар Москве, Мельцер Марка кулгал деш. «Сердало» газетага ше къамаьл деш, Руслана Фатимас кикбоксинг вай мехкарашта юкъе йоаржаярах шийна хетар аьлар.

- МалагӀа моттиг дӀалоац кикбоксинга хьа вахаре?

- Кикбоксинг – са вахаре эггара лоархӀамегӀа дола дакъа да. Цунна чуйоагӀа къаьстта йола ха.

- МалагӀа пайда бахь цу спорто кхалнаьха могашала?

- Бокс, кикбоксинг- цу спорте еррига дегӀа маьженаш болх беш я. Цо кертага даим болх байт, хӀамах кхеташ хул, кӀоарга садаха таро хул, иштта чӀоагӀду дегӀа пхаьнаш, дегага дика болх байт.

- Ӏайха хержача профессеца керттердар фу хет хьона?

- Со хьож айса Ӏомадаьр кхувш доагӀача ноахала дӀадала- из дикагӀа бола безам а, спорта мутӀахьа хилар а да.

- МалагӀа масал лу Ӏа наха, мел дӀакхоачаш да из царга?

- Укх дунен тӀа, де карагӀдаргдоацаш хӀама дац.

- Вай мехкарашта юкъе из спорта оагӀув чӏоагӏлургья, аьнна, хетий хьона?

- Сона хетачох, кикбоксинг эггара хьалхара моттиг дӀалоацаш я, спорта оагӀон юкъе. Из массадолча даькъе дегӀайоагӀаш я, профессиональни яр а йоацар а. Бакъда сона дезар паччахьалкхено цунна теркам тӀабахийтар, из олимпийски хургйолаш. Дукха къамаьлаш хиннад цу хьакъехьа. Со тешаш я, цхьан хана из хоза, чӀоагӀа спорта оагӀув Олимпийски ловзарех хургья, аьнна.

Лоацца биографи:

Боканаькъан Руслана Фатима яьй 1982 шера саькура бетта 14-ча дийнахьа Нохч-ГӏалгӀай АССРа МагӀалбик-Шахьаре.

Из дешаш хилар СоагӀапча №8 йолча юкъерча ишколе, цул тӀехьагӀа цар дезал Шолжа-Гӏалий тӀа баха дӀабахар. Из дӀахо дешаш хилар Шолажа-Гӏалан №42 йолча юкъерча ишколе.

Лакхара дешар дийшад цо ГӏалгӀай паччахьалкхен университете.

Спортивни толамаш:кикбоксингах йола спорта мастер; Россе цхьайттаза котало яьккхар; дунен кхозза котало яьккхар (2005 ш., 2009 ш., 2011 ш.,); Еворпан чемпионка; дунен Кубке диазза котало яьккхар; Пекине дӀадихьача Хьалхарча Дерригач дунен латара искусствай ловзарашка котало яьккхар.