Россе Президента СКФО гӏолла викал ваьча Чайка Юре хоадам болаш дийцар цу даькъ тӏара гӏулакхаш, уж моттига куран тӏа долаш а юха тохаш а хиларах. Цо белгалдир, цу гӏулакха тахан накъадаргдар да низа болхлоша, ӏаьдала викалашца цхьана болх беш, хоамий даькъ тӏара хьал дика тохкаш, иштта моллагӏа дегабуам беш дола хьал сиха юкъера дӏадоаккхаш хилар.

Къаьстта терко тӏаяхийтар Чайка Юре таханарча технологически хьалашта, деш долча кхайкарала - дукхагӏча даькъе искусственни интеллект юкъейоаккхаш хилара, уж леладу Даькъастен бахархошца, уж ба дукхагӏа ӏехабара аттагӏа бола нах. Цу гӏулакха духьалъоттара, Пятигорске дӏайолайир лаьрххӏа йола контент-центр. Цун маӏан да- документальни кино, нейросетей материалаш хьакхоллар, уж эшаш я исторически бакъдар лорадара, Россе юкъара цхьоагӏо чӏоагӏъяра, къамашта юкъера, динашта юкъера гӏулакхаш хьаллацара.

Иштта Мехка президента СКФО гӏолла волча викала белгалдир, бахархошка, иштта дешарга гӏолла мехкагадаккхара проекташ дӏахьош бувзам лелабар, кагирхошца къаьстта вӏашагӏкхетараш дӏахьош, царца уж хаттараш дувцаш, царна гонахьара хьал довзийташ хилар. Цо яхачох, пайда луш бола болх дӏабахьара ӏаьдала доакъош вӏаший бувзам болаш хила деза, иштта цига дакъа лоацаш хила беза кхелахой, юкъарлон викалаш.

Гӏалгӏайчен кулгалхочо Келаматанаькъан Махьмуд-ӏаьлас белгалдир, цу кхетачене дийца кхоачамбоацарашца дувзаденна дешаш республиканна лоархӏаме хилар. Республике из болх вӏашагӏбеллаб, кагирхошца цахаддаш хьехама кхетаченаш дӏахьош я, царна хьалхадоах къаман мах бараш лорадар, харцахьарча наькъ тӏа цавалар лоархӏаме долга.

Цу даькъ тӏа белггала дола дакъа дӏалоацаш я ЦУР. Цун говзанчаша даим хоамий даькъ тӏара хьал довзара болх беш ба, харцахьара хоамаш юкъера дӏадоахаш, цул совгӏа боахамашца цхьана бувзам лелабу. Дӏадахача шера ЦУРо сиха юстардаьхад цхьа ткъаьх цу тайпара харцахьара хоамаш юкъедалара хьалаш, уж дар наха юкъе цатоам баккхара лаьрхӏа. Карарча шера из болх чӏоагӏбаьб нахаца бувзам лелабара, юкъера харцдараш дӏадахара.

Республикан Кулгалхочо къаьстта терко тӏаяхийтар гаьна болаш леладеча зуламашта, уж хьож ма хулла цу юкъе кагирхой баха, уж ӏехабе, мессенджерашка гӏолла царга во хӏама дайта, цу гӏулакха леладеш хӏама да из. Ишттача моттигашта духьала республикан ишколашка таьрахьий цӏенон урокаш дӏахьош я, иштта берий даьшца-ноаношца къамаьл хул, маьцхали бетта берашца терроризма духьалара медиапроекта яхь дӏайихьар. Цул совгӏа, тов бутт чакхбоалаш, Гӏалгӏайчен Кулгалхочо боахамашта тӏадиллар кхоллама майдаш, кагирхой медиастуди хьаеллар, царга гӏолла дикал йола хьехам луш йола роликаш хьаергйолаш.

Идеологи дӏаяхьара даькъ тӏа Гӏалгӏайче дукхагӏа терко тӏайохийт мехкагӏончала, исторически бакъдар лорадара, дин машар лелабара. Махьмуд-Ӏаьла тешаш ва, зуламаш юхатоха таро хургья; дешара, юкъарлон вӏаший тешам бола оагӏонаш шоайла бувзам лелабеш хилча.

Укхаза лоархӏаме да «Къонача эскаро», лаьрххӏача операце доакъашхоша хьаллоацаш хилар, уж хьехамчаш санна хила беза цу дешаца. Бӏухошца дийна бувзам лелабаро, цар денал гуш хиларо, царца тӏема гӏулакхаш дувцаш хиларо таро лу дикагӏа довза бакъдар, кагирхой нийса хьалкхебе.

«Сона нийса, лоархӏаме хет вай заман кхерам гучабаккхара хьехам балара гӏулакхаш нахаца цхьана леладеш хилар. Вай декхар да - зуламашта духьалъэтта а ца ӏеш, юкъарлонца тешаме къамаьл ду болх дӏабахьар, дика кхетам луш кагирхой кхебар, ший аргӏагӏа къамашта юкъера цхьоагӏо лораяр»,- аьлар Келаматанаькъан Махьмуд-Ӏаьлас.

Пятигорске хиннача вӏашагӏкхетаре дийца кердадараш, республикан кхерамзлен балха юкъедоахаргда. Къамашта, дин гӏулакхашта юкъера хьал тоадар, из лорадар Гӏалгӏайчен цхьан ӏаьдалах тийша дац, цига дакъа лоацаш хила беза бахархой шоаш а. ӏаьдала болхлой, иштта юкъарлон барт, шоайла тешаш хилар юкъе хилча, республикан дика кхоане тешамеча наькъ тӏа я.