Къахьегамах хьадоала беркат
Наьха хаттарашта жоп делар Мехкадас, телеэфире гӀолла
«Магас» яхача къаман телевидене гӀолла; вайцигарча бахархой, иштта кхыйолча моттигашкарча наьха хаттарашта жоп луш хилар вай Мехкада Келаматанаькъан Махьмуд-Ӏаьла. 200 минутага кхоачаш даьча къамаьла юкъе, дукха хаттараш даьшхар къаман Кулгалхочо. 300 совгӀа хаттар дар наха даьраш. Иштта цу кхетаче дакъа лоацаш, наьха хаттарашка ладувгӀаш хилар Мехкадаь гӀончаш, республикан паччахьалкхен доакъашхой, администрацей кулгалхой. 2023-ча шера республикан вахара-экономически хьал тоадара тӀехьа дӀабихьача балхах дийцар Мехкадас.
Белгалдир кхоачашде дезарашта юкъера эггара лерхӀамегӀа дараш. Республикан кулгалхочо дийцар, вай мехка хьалъеш латтача 12 ишколах, 13 берий бешах, иштта хьатӀадоагӀача шера хьалъе лерхӀача йоккхача дарбанченах. Хьехам лу поликлиника хургья цунца, 100 совгӀа унахо дийнахьа тӀаэца таро йолаш. Дикка теркам беш хьоахадир Мехкадас, вайцигара вахара-коммунальни боахамца дараш, хьатӀадоагӀа РФ президента хоржамаш, тахан Палестинага кхаьчача доккхача хатарах.
ЦӀенхаштта наркотик яхача зулама духьалъоттара тӀахьийхар цо бахархой. Ӏаьдала болхлоша, вай массане, беррига низ Ӏобилла, соцаде, хоададе дезаш во да из! Боккха пайда беш хургь; бахархой, юкъара болх бераш, тайп-тайпарча моттигашкара къахьегамхой гулбаь; дӀахьош йола кхетаченаш.
Палестинерча бусалба наха ловш латта Ӏазап, харцо, цу бусалбашта тӀакхаьча хало вай дегаш дохадеш, делхадеш я. 100 палестинец тӀаэца кийча да вай, яхаш, дийцар Келаматанаькъан Махьмуд-Ӏаьлас. Баха, шоай вахара гӀулакхаш леладе царна мел эшар кийчдаьд вай. Иштта дийцар, федеральни наькъ тӀа машенашта тӀахьожам бе оттадаьча оаз йола оасаш яхача хӀамаех. Наькъашкара хьал тоаде аьттув хургба полице болхлой цар гӀонца.
Керттерчарех да, аьнна, хьоахадир Мехкадас; нах кхувлаш йолча машений гӀулакх. Паччахьалкхенна тӀадиллар цо, малагӀча моттиге машенаш тоъаш яц, цига эшача хӀаман тохкам бар. Кастта республике хьакхача езаш я 78 автобус. Эггара чӀоагӀагӀа эшаш йолча моттигашка дӀахьожае еза уж. Дукха хаттараш даьшхар зарбан кхетаче. Бахархошта къувлаш мел хинна оагӀонаш тохкаш, боаггӀаш бола болх дӀахьоргба.
