Шоай декхар кхоачашдеш лаьттараш
Эзараш вай мехкахой бахаб тIема шерашка Даьхе лорае
Наьсарерча Дагалоаттама Мемориале Коталон денна хетаяь дIайихьача кхетаче дакъа лаьцар вай Мехкадас Келаматанаькъан Махьмуд-Iаьлас, тайп-тайпарча моттигашкара хьакимаша, къонача эскархоша, республикан бахархоша. ТIема шерашка денал, майрал дIахьокхаш лаьттаб вай къаман бIухой. Фашист ше чугIортарах дехкевоаккхаш, духьале йир цар.
«Низ болча къонгаша, кхалнаха вохавир моастагIа, цу бирсача шерашка. Iазапах, лоалах мукъабаьхар дуккха нах. Шоай лоIамагIа ихар вай мехкахой тIем тIа. Боврах ца кхераш, тIема аренаш тохкаш лийлар уж. Цар массане цIераш вай дегашка яхаргья бIаьшерашка! Кхувш латтача тIехьенна бовза беза сийдола къонгаш, мехкарий. Вай массане доаккхал деш, дег чу боча лелабе беза нах ба уж! Аз даькъаладувц шо Коталон денца! Иразе, машаре, беркат долаш яхийла вай Даьхе!», — аьлар ший къамаьла юкъе Мехкадас.
Уж тайпара кхетаченаш вай мехка массахана дIакхухь. Цо хьахьокх, тIема шерашка вахар хаьдараш, котало йоаккхаш лаьттараш вай дегашта бицлургбоацилга! Гитлер яхача бIехача адамо вай мехка тIабена бала дагалувцаш бар нах. ТIема истори дуне мел латт дахаргда! Сийдолча бIухоех лаьца кхувш латтарашка дувцаш хила деза вай даиман. «Коталоно бохабир Гитлеро вIашагIбелла бIу. ВIалла а цаметтар дайра цунна, вай лаьтта чугIортарах. 44 дийнахьа хьаяьккхаяр цар Франци, хIаьта Сталинграде 44 дийнахьа цхьа урам дIалаца мара аьттув хиланзар цар! Ше тIакхелла харцо, шийх яхар Гитлерах. Сийдолча бIухоша хоадайир цун лар вай лаьттан тIара», — яздир ший телеграм-канале Мехкадас. Кхы ма гулда цхьаннена а тIемца дувзаденна Iазап! Маьрша хилда вай денош!
