Из дешара моттиг лакха балха говзал йола нах кхеберех лоархӀаш я, цига кхебу дег чура Даьхе езараш, из бахьан долаш шоай са дӀадала кийча бараш. Кадетий вошало вӀашагӀтох низá, деналá, гӀулакхá чӀоагӀагӀбараш, шоаш лаьрхӀачунга кхача гӀертараш, ГӏалгӀайчен сий лакха лоаттадеш, тайп-тайпарча вахара наькъ тӀа дӀабаха кийча бараш.

Корпусе дешараша дика Ӏомаду Ӏилма, профессиональни говзал, цар дӀахо деш дикагӀа йолча тӀема, граждански вузашка, иштта Россе низа оагӀон дешара моттигашка.

Дика говзал караерзаяьчул тӀехьагӀа, цар хьалоац бехктокхаме йола паччахьалкхен Ӏаьдала моттигаш, нах кӀалхарбоах лорий, МЧСа балха доакъош тӀа, дика къахьег экономикан даькъ тӀа хьамсарча республике санна цун доазол арахьа а.

Таханарча кадеташа шоаш деша багӀача моттигера сий лакха лоаттаду. Лоаман кадетий корпуса дешархой котбувлаш хул каст-каста ерригроссийски яхьашка, цар иштта ГӏалгӀайче гойт мехка керттерча патриотически майдаш тӀа.

Физически кийчо, чӀоагӀа дисциплина хиларо таро лу царна спортивни даькъ тӀа дӀахьош йолча яхьашка коталонаш яха. ГКК дешархошта, выпускникашта юкъе республикан, куран, ерригроссийски каратэ, кикбоксинга яхьашка котбаьннараш ба. Дешара моттига спортивни сийлен цӀи яккха новкъостал деш ба спорта мастералла кандидаташ, дунен чемпионаш, дунен Кубок яьккхараш.

Даьхенна мутӀахьа хилара тешал деш йола керттера экзамен яр, цига дийша баьннараш лаьрххӀача операце дакъа лоацаш хилар. Тӏема мугӀарашка карагӀдаьнначох, деналах, майралах царна елар орденаш, майдилгаш.

СВО даькъ тӀа карагӀдаьнначо хьагойт цар тӀема кийчо лакха хилар, Даьхенцара безам чӀоагӀа болаш, дика кхетам царна бенна хилар шоай хьамсарча Лоаман кадетий корпусе.

ЛаьрххӀа йола кхетаче дӀахьош, Лоаман кадетий корпуса белгалбаьннача болхлошта совгӀаташ луш дар. Из дар балха говзал лакха йолча къахьегамхоша хӀара денна дер тӀаэцаш хилар. Цар доккха дакъа лаьцад массайолча оагӀорахьара кхетам болаш, лерттӀа ноахал хьал- кхедеча, тахан уж ба республикан цхьацца дола лоархӀаме балха дакъа дӀалаьца латтараш.

Хьехархой, эпсараш-кхетам лураш, корпуса хьехамчаш - из боккъонцахьа йола ганз я, цу тӀа хьакхолл ГӏалгӀайчен хургдар. Цар балха говзал лакха хилар бахьан долаш, шоаш тӀаийца гӀулакх бехктокхаме дӀахьош ба Лоаман корпуса кадеташ, уж ба бокъонца бола, Даьхе лорае кийча бола шоай мехка бахархой.

Царна дӀаденна хӀара совгӀат тешал деш да, кадетий тешшаме Ӏадаташ лорадеш хилара, хьаькъал дола, сабаре, дика кхетам бенна къаман къонгаш цига кхебеш хилара, уж ба вай мехка хургбола толашагӀа бола, тӀема гӀулакхаш леладергдола нах.