Триколор ГIалгIай мехка
«ХIарма» яхача Магасерча кхетачен доакъашхоша йоккха байракх йоаржайир шахьаре
РФ байракха Денна хетабаь болам дIабихьар Магасе «ХIарма» яхача кхетачен доакъашхоша. 20-30 метрага кхоачаш йола байракх йоаржайир шахьаре 200 совгIа болча доакъашхоша. Царна юкъе бар хьатIабаьхка хьаьший, коммерчески лоархIаш йоацача моттигашкара къахьегамхой, гIо деш лелараш, иштта кхыбараш а. ГIалгIай Паччахьалкхен университета хьалхашкарча доазон тIа дIайихьар из лоархIаме моттиг.
Доккхача цIайца мехкахой даькъалабийцар Мехкадас Келаматанаькъан Махьмуд-Iаьлас. «Россе байракха вай дегаш ураоттаду, Даьхен гIулакха латта везилга, цун сийле лораеш хилар лоархIамеча декхарех долга белгалду», - аьлар вай Мехкадас.
Боламе лоархIаме дакъа лаьцар Россе турпал, Юкъарча палатан кулгалхочун хьалхара гIонча волча Бочаров Вячеслава. Запорожски областа РФ ОП доакъашхо волча Рогов Владимира дийцар, Новороссе бахархошта из ди чIоагIа лоархIаме, ший тайпара дега гарга, деза долгах. Мохк Россех хьатохаш лаьтта дов дагалаьца, цхьацца цу ханацара хIамаш дийцар цо.
Росси Президента Юкъарча проектий оагIон кулгалхочун гIонча волча Журавский Александра, байракха Денца берригаш даькъалабувцаш, белгалдир, вай мехка машар, цхьоагIо лораяра тIехьа цу кхетачено лоархIаме моттиг дIалоацилга. Таханарча хано дIадехарашца йийзар цо «Россе сийле: бIаьшерашка денз хьадахьа Iадаташ, истори лорадар» яха кхетачен тема.
