Илдарха-ГӀалий тӀара хьехархо котъяьлар зиракел
Хьаькъала боарм гойташ дола ловзар
Укх деношка чакхдоалаш да Ӏана замах дӀахьош дола «Фу? Мичахьа? Маца?» яха хьаькъале ловзар. Котало яккха дага ловзаш яр Козлов Андрея, Поташев Максима тоабаш. Уж вайна дагабоагӀа Ворошилов Владимира хана денз, цар ловзарга хьожаш хиларах.
Поташева тоаба ловзаш яр укх наькъа, цо къаьгга котало а яьккхар тӀатоха а тӀерадаккха а хӀама доацаш, 6:5 чот йолаш. Пхе коталон юкъе цхьа котало ера ГӀалгӀайчен Илдарха-ГӀалан яхархочо, ингалсий мотт хьехаш йолча Гаьгенаькъан Зарас, оаха из цу коталонца даькъалаювц.
Цу ловзара чудоагӀаш оттадаьдар ши хаттар, уж дар цхьатарра цӀи йолча шин юртара: ГӀалгӀайчен Карабулакера, Казахстана Карабулакера. Программа дӀахьош хинначо хаьттар, хьаькъалерча ловзаре дакъа лоацаш хиннарашка, мишта таржам де деза хой шоана, аьнна. Бакъда царна цунна жоп дала маганзар.
«Пушкин вешаш хила. Карабулак- Ӏаьржа хий», - аьлар программа дӀахьош хинначо.
Тайп-тайпарча Карабулакашкарча шин хаттара жоп дала ховш хиланзар ловзаш хиннараш. Цул совгӀа, ловзар чакхдаьнначул тӀехьагӀа, Казахстанера хаттар цаӀ дикагӀчарех а хилар. Бакъда, ГӀалгӀайчера хаттар а кхы цунна тӀехьадусаш дацар.
