Аьтинга бетта 18-ча денгара 21-ча денга кхаччалца, дӀайихьар халкъашта юкъера экономически кхетаче, керттера дийца дош дар «Юкъара мах бараш - дукхача оагӀоний дунен тӀа дегӀаахар». Дика дакъа лаьцар кхетаче ГӀалгӀайчен викалаша, шоашта керте мехка кулгалхо Келаматанаькъан Махьмуд-Ӏаьла волаш.

Республика юкъейоалаш йоагӀа ерригроссийски, халкъашта юкъерча кхетаченашта, цо хьаел йоккхача экономически тароний наӀараш. Цу тайпарча кхетаченашка дакъа лоацаш хиларо мехка дика пайда бу: цар гӀулакхера бувзамаш вӀашкаоз, инвестицеш юкъейоах; мехкашца, моттигашца шоайла балха говзал екъ.

ГӀалгӀайчено ший толамаш гойтарал совгӀа, экономически дегӀаахара керда таронаш хьаелл.

ПМЭФ ГӀалгӀайчен викалаша дакъа лоацаш, кертте лаьттар дар мехка инвестицей таронаш гойтар. Кхетаче дӀахьош дийцар агропромышленни комплекса, энергетикан, туризма, лакхача технологей даькъ тӀа пайда луш йола проекташ хиларах. Келаматанаькъан Махьмуд-Ӏаьлас белгалдир, республика дика къахьегаш хилар, бизнес дӀаяхьара дика хьалаш хьакхолла хьожаш.

«Бизнеса лаьрхӀа оаха юкъедоах из хьаллацара кердадараш: дӀатакха аттагӀа дола ахчан хьалаш Ӏалашду промышленность дегӀаяра Ганзага гӀолла, хӀама дӀадоладеш волча сага йола йоал яккхара хьал гаьнадоаккх, инфраструктура юкъеяккхара субсидеш тел. Къаьстта терко тӀайохийт, кхыча мехкашца кхачан продукци лоаттаеш, дӀа-юха хувцамаш дара, уж я берий кхача, гӀишлон материалаш», - аьлар Келаматанаькъан Махьмуд-Ӏаьлас «Интерфакс» ИА интервью луш.

ПМЭФ иштта керда бувзам лелабара дика майда хилар. Цу даькъ тӀа мехко кулг яздир Российски лорий университетаца цхьана, ГӀалгӀайчен лорий организацешка лорашта лаьрхӀа диплом хьаийцачул тӀехьагӀа долча дешара Центр хьакхоллара. Лорий таро хургья республике деша а шоаш лелабеча балха даькъа яьча программах балха говзал лакхъе а.

Цул совгӀа, республико барт бир А.Ф. Можайске цӀерагӀча ТӀема-космически академеца, кагирхошта Даьхенцара безам совбоаккхаш бола кхетам балара болх цхьана дӀабахьара; иштта культуран оагӀон ганза Президентаца.

ПМЭФ - из экономически таронаш хинна Ӏац, из я ГӀалгӀайчен дика цӀи халкъашта юкъе дӀайоаржаяра йола таро.

Республикан Кулгалхочо дийцар ше доал деча моттига карагӀдоалар. Журналисташца къамаьл деш, цо белгалдир тайп-тайпарча доакъошка де карагӀдаьннар: туризма, вахара доакъошка, промышленносте. Мехка инвестораш юкъабахара болх дӀахо дӀахьош ба, цунна керттера терко а лоаттаю, из къаьстта белгалду Келаматанаькъан Махьмуд-Ӏаьлас.

Из кхетаче дӀаяхьарах, 50 совгӀа мохк вӀашагӀкхийтар, цу юкъе Белорусси, Китай, Инди, ОАЭ, Саудовски Арави, Паччахьалкхе Бахрейн. Къаьстта цудухьа ГӀалгӀайченна лоархӀаме да, цу тайпарча моттигашка ше гойтар. Цо таро лу, болаш бола бувзам чӀоагӀбарал совгӀа, керда наькъаш лаха российски, кхыча мехкашкарча балха новкъосташца. Цу тайпара бувзамаш эшаш да дукхача тороний дунен тӀа, къаьстта экономически регион дегӀаяра.

Кхы кӀезигагӀа доацаш лоархӀаме да культуран даькъ тӀара хьал а. ГӀалгӀай мохк культуран тӀехьале йолаш ба, из гуш хиларо цу моттига дика таро лу. Из накъайоал туристически даькъ тӀа.

ГӀалгӀайче Петербургерча халкъашта юкъерча экономически кхетаче дакъа лоацаш хилар лоархӀаме да экономически хьал тоадара. Республико гойт ше кийча хилар керда проекташ кхоачашъе. Цо таро лу республиканна дика дегӀааха, иштта чӀоагӀъю халкъашта юкъерча даькъ тӀара кӀийле.

«Со тешаш ва, ГӀалгӀайчено, йоккхача Россе дакъа ше хиларах тарра, инвестицеш юкъеяхара, балха моттигаш хьакхоллара, лоархӀамегӀа йола проекташ кхоачашъяра эша таронаш лелаергья аьнна»,-белгалдаьккхар Келаматанаькъан Махьмуд-Ӏаьлас.