Къонача спортсменаша шоаш хьабовзийтаргба, хьалхабоаларгах удаш, нек деш, лаьттара кулгашца хьалъийлуш, турника тӀа низ гойташ. Иштта кхыдараш а да фестивала юкъе. Яхьаш дӀахьоргья; «Мужече» яхача спорта кийчо еча моттиге, «Аьрзи» яхача берий лагере, Наьсарерча футбольни доазон тӀа, Шолжа- Шахьарерча нек де моттиг йолча ФОКЕ.

Укх бетта 9-ча денгара 15-ча денга кхаччалца йолча яхьашка дакъа лоацаш хургба Россе 50 моттигера спортсменаш. Йоккха кийчо еш ба тахан мехка цу гӀулакха.

ГТО Ерригача Россе фестивала хетаяь лаьрххӀа кхетаче дӀайихьар Паччахьалкхен хьалхалаттача Сластенин Владимира. Кхетаче гулбеннабар яхьаш дӀаяхьара балха юкъе дакъа лоацаш бараш, тайп-тайпара министерствош. ХӀара моттига ше-ший декхараш тӀадехкар; белгалдир, из болх боаггӀача боараме чакхбаккхар чӀоагӀа лоархӀаме долга. Фестивала юкъерча керттердарех дийцар вӀашагӀкхетаре. Къаьстта йоккха терко тӀайохийташ дийцар кхерамзлен хьалаца, логистикаца дувзаденнарех. 

ГТО фестиваль вай мехка эггара хьалха дӀахьош я, массабараш раьза хургболча тайпара из дӀаяхьа гӀерт тахан мехка, дукха низ Ӏобилла. Кагирхошта юкъе спортацара безам, бувзам чӀоагӀбар да цу юкъе эггара лоархӀамедар. Россе йоккха спорт йоаржаяра тӀехьа боаккхаш, боккха гӀа ба из.

Фестивалага кийчо ераша тахан вӀашагӀйоллаш латтача программан юкъе спортацара яхьаш хиларал совгӀа, культуран оагӀонцара, гӀалгӀай къаман Ӏадаташ, оамалаш йовзийташ дараш да. Спорт езар, низ болаш хилар массахана лакха лоархӀаш хиннача мехка белгалонаш йовза аьттув ба, гаьнарча моттигашкара тӀагуллургболча спортсмений.

Россе тайп-тайпарча моттигашкарча студенташта юкъера бувзам, барт чӀоагӀбеш, ГТО тахан кхувш латтача тӀехьен юкъе йоаржаеш хургья фестиваль.