Цу оагӏонцара гӏулакхаш геттара чӏоагӏа лораде дезарех да – тоабан бӏухой Гӏалгӏай мехкара арабала йиш йолаш бац, моллагӏа хӏама ийккха болх хуле, массахана кийча хила беза уж. Цар лораде дезача декхарашта юкъе да хий хьалу моттигаш, газа станцеш, тока моттигаш лораяр, массахана ӏаьдала болхлошца бувзам болаш, юкъарлон оагӏонцара хӏама лорадар, иштта саг чувоацаш гӏетташ долча гӏирсашта духьала болх лоаттабар.

Карарча хана тӏема комиссариаташ ӏаьдала болхлошца чуденнача дехарашца тохкама болх дӏахьош ба. Цу оагӏонцара декхараш кхоачашдеш йола тоабаш вӏашагӏйохкар РФ герзашцарча низий Министерстве белгалдаьраш лорадеш дӏахьош болх ба.

Цу тоабан юкъе хила ловш, дехар чулураш 18 шерал тӏехбаьнна, дегӏа могашал лертӏа йолаш, психологически оагӏонцарча декхарашта боаггӏача боараме чакхбаьнна хила беза.

Цул совгӏа, 53 шерал тӏехваьнна хила йиш яц дакъа лаца ловш вар, тӏема декхараш кхоачашдара гӏулакх довзаш вале, геттара дика да, хӏаьта из цахилар а цу юкъеоттара духьале еш хилац. Тӏема комиссариате цу гӏулакха хьатӏавоагӏача сагага Россе вахаш волча сага паспорт, тӏема билет, ший автобиографи, анкета, дешарах дола каьхаташ, иштта къахьегама книжка хила деза.

Психологически оагӏонца дӏабахьа безаш болча балхах чакхбаьхе, хьахоржаш ба уж нах лаьрххӏа йолча моттиге, е 503-ча гвардейски мотоиччархой полке. Ялх бетта бартчӏоагӏо оттаеш долча каьхата кулг язду цар цига.

«БАРС» доакъашхошта паччахьалкхено лаьрхӏа гӏо деш къоастадаь хӏама да, цу юкъе да болх бе моттиг, юкъерча боарамга хьежжа алапи хилар.

Цул совгӏа, ха тӏа латтача деноех хьожадаь моттигера, федеральни оагӏонцара ахча да царна, мах боацаш лорашка чакхбала, дарба де аьттув ба, могашал эшаенна болх хуле, ахчанца гӏо дергда. «БАРС» тоабан юкъе хилар сага лоӏамцара гӏулакх да, цунга хьежжа, шоаш леладер боаггӏача боараме кхетадеш болча къонахий никъ ба из. Республикан сигале лораеш, зуламхошкара хила тарлуча моллагӏча кхерама духьала кийчо еш ба тахан мехка. Мехкарча Халкъа Гуллама хьалха латтача Гаьгенаькъан Руслана региона хӏама лорадар эггара керттерчарех да, аьнна, белгалдеш, дӏаболабаь болх ба из.

Цу проекта кулгал дер, тӏахьожам лоаттабер ва Халкъа Гуллама депутат вола Чуранаькъан Мустафа. Гӏалгӏай мехкарча ӏилман-хӏама доаржадара моттига говзанчашца бувзаме волаш, Чуранаькъан Х.Т. цӏерах йолча Даькъастен доагора-энергетически колледжа пхьоаллешка цхьацца кхоачам хьакхоллаш болх дӏаболабайтаб цо. Болх хьабе кулгаш цига долаш да тахан, ма дарра аьлча. Говзанчаш, колледжа студенташ, цу сахьате из гӏулакх хьаллаьца, къахьега дӏаболабелар.

Цхьана дӏабихьача балхах хьахиннар тахан гуш да ала йиш я. Лаьрхӏа йолча йиъ «турелейх» хьалхара дакъа кийча да. Уж мобильни станокаш эшаш я стрелкови оалача герзаца. Моллагӏа тайпара долча саг чувоацаш гӏеттача гӏирсашта духьале еш, царна тӏеххьа герз дӏадерзаде эшаш хӏамаш я уж, хӏаьта из боккха, лоархӏаме болх ба ала деза.