«Магаса» хӀама хувцалургда
ГӀалгӀай аэропорте керда хувцамаш деш хургья приватизаци
«Магас» яха аэропорт доалаерзаяьй аьнна хьакхайкадаьд. Из соцам баь, акцеш йохка оттаяьй. Республикерча аэропорта вахаре керда хувцамаш деш хургда из караерзаяр. Белгалде деза, ерригача Россе моттигашка из хӀама тахан даржаш латтилга.
Вешкаранаькъан Мурад – республикерча лаьттай, доалахьарча хӀамай гӀулакхех йолча министерствон кулгалхо. «Магас» яха аэропорт караерзаяр духхьал цунна доал дергдараш хувцар хинна Ӏац, вай мехкарча авиаце оагӀув боаржабара, тоабара тӀехьа лоархӀаме гӀа ба из. Керда вахар денна, таханарча хано дӀадеххача тайпара тоаде деза цун хӀама.
Цу оагӀонцарча болхлоша белгалдечох, 95% Россера аэропорташ тахан цхьаццане доалахьа я, хӀаьта хӀанз «Магас» а царех дӀакхетаргья. Из караерзаяра гӀулакх дувцаш латта дукха ха я, экономикаца дувзаденнарашта тохкам беш. Дуккхача шерашка республикерча ахчах болх дӀахьош хиннай аэропорт. ХӀара шера 100 миллион совгӀа рузкъа да цун гӀулакхашта хьакъестадаьр, хӀаьта из ахча вай республиканна чӀоаггӀа Ӏаткъаш хул.
Авиаце гӀулакха инвестораш чуозара балха юкъе цхьаь яц вай республика. Цунна гонахьара аэропорташ: Буро, Нальчик, Минводаш, Ставрополь, Махачкала - дукха хана денз шоай хӀама тоадеш я доалахьарча компанеша лелаеш.
Аэропорт доалаерзаяра юкъе керттердарех да, цун хӀама дикка тоадеш йола программа йоаржаяр. Керда, таханарча хано дӀадеххача тайпара йола терминал хьалъе лерхӀ цига.
Адам, авиакомпанеш дукхагӀа тӀаозаш, керда рейсаш хьаеллара тӀехьа дикка аьттув луш хургда из гӀулакх. Цул совгӀа, аэропорта гӀишло а наха паргӀатагӀа, аттагӀа хургйолча тайпара тоае лерхӀ. Белгалде деза, цхьаццадараш – фецара кема айлуш, Ӏоховш дола наькъаш, сердалца хоамаш ду оагӀув, перрон федеральни оагӀон кара хургья, аукционе оттаергьяц.
Аэропорта хьал тоадеш, дӀатӀадахийта дезар дукха рузкъа да. Керда терминал хьалъеш, дӀалаьрхӀача, дӀагӀоргдар 2 миллиард совгӀа ахча да, хӀаьта из гӀишло тоаеш дӀагӀоргдар 515 миллион совгӀа ахча да. Аэропорт караерзаярах хургдола уж хувцамаш аэропорта, иштта мехкарча экономикан хьал меттадоаладеш хургда.
«Магас» аэропорт караерзаяр дуккха керда, аьттув луш дола хувцамаш юкъедоаладеш да. Таханарча заманга хьежжа тоадергда цун гӀулакх, дикка къахьийга. Теша лов, из караерзаяьча инвестора ший болх лакхача боараме дӀахьош, «Магаса» куц, цун гӀулакхаш хиннарел дикагӀа тоадеш, цун хьал таханарча ханага диллача хила деззача тайпара хувцаргхиларах.
