Массайола оагӏув чулоацаш, гӏо дар
Шолжа чура кӏаьнк лохачарна гӏо деш ба вай лораш
Шолжа чу ваха кӏаьнк лохаш латта бархӏлагӏа ди да, цу юкъе дакъа лоацарашка хьожаш ба тахан вай мехкара лораш. Цу юкъа 100 гаргга саг ва лорашта тӏавенараш, цо хьагойт балха юкъе дукха адам долга, массахана кийча хила везилга. Дербичанаькъан Хизар хи чу вахача хьалхарча дийнахьа денз, вай мехкадас Келаматанаькъан Махьмуд-ӏаьлас тӏадилла, унахцӏенон гӏулакхех йолча министерствон хьалха латта ӏалбаканаькъан Зара цу балха кулгал деш я.
Гӏо де арабаьнна хи чу боахкарашта эшача хӏаманга хьажар, цар унахцӏенон терко яр лоархӏамеча гӏулакхех да тахан. Нах хӏара денна дукхагӏа хулаш латт, цунга хьежжа лорий тоабаш а хӏара миноте кийча хила езаш я. Гӏо деш барий лагере ба лораш, цу тайпарча моттиге эшаш мел бола кхоачам болаш ба царга, иштта 24 сахьат ха йоаккхаш ба цига гӏо деш бола лораш: терапевташ, хирургаш. Ди-бийса ца къовсаш хила боахкача нахаца дагадоацар хила тарлу, цудухьа царна уллув хила безаш ба лораш. Къахьегаш барашта хьалхадоаккх цар фашкарго е кхыйолча хӏамо царг теха, сов дукха маьлха кӏалха латтарах, сов дукха шийлача хи чу валларах дегӏа хьала ӏоткъам хуле, эггара хьалха фу де деза.
Вай мехкарча клиникаша кхайкадаьд, цу боккхача балха юкъе дакъа лоацаш мел хиннарашта эшаш дола новкъостал де, уж тӏаэца кийча я шоаш, аьнна. Дегӏаца моллагӏа хӏама гучадоале: жамараш лазадаьнна, йӏовхал айенна, бӏаргаш цӏийденна, боад етташ дале, дегӏа низ дӏабоале, теркал ца деш дита йиш яц, сиха ваха веза лорашка! Ханнахьа лорашта тӏавахаро могашал геттара кӏалйитац.
