ГӏалгӀайчен кулгалхочо Келаматанаькъан Махьмуд-Ӏаьлас цох дувцаш аьлар, из доккха гӀулакх кхоачашдеча волонтёраш доккха дакъа лоацаш хилар. Цо белгалдир, къаьстта уж хилар бахьан долаш, тахан сагӀа хӀара цӀагӀа дӀакхоачаш да.

«Рамадан – из дег чура дика гӀулакхаш леладара бутт ба, халача хьалашка бахача наха новкъостал дар лоархӀаме да. Карарча шера, хьалхагӀа санна теркама юкъе ба таро йоацараш, иштта вай тӀема турпалхой дезал. Из болам дӀахьоргба кхаь дийнахьа, республикан гаьнарча юрташка кхачара лаьрхӀа йилла ха я из», - аьлар Келаматанаькъан Махьмуд-Ӏаьлас.

Кхачан тускарашка да хьалхарча аргӀагӏа эшаш дола даар, из таро йоацача наха дика новкъостал да. Мехка Кулгалхочо иштта кхайкарал дир юкъарлонга, таронаш йолча нахага цу гӀулакха юстара ца бисар дехаш, шоай йолча таронах безача мархий бетта мехкахошта новкъостал дар дезаш.

ГӀР зарбан болх лелабераша тӀатехар, болам дӀабахьара болх вӀашагӀбеллаб, ма хулла нах бахача моттигашка из новкъостал дӀакхоачаргдолаш; деррига гӀулакх лацара хьалаш лорадеш, цунца цхьана ГӏалгӀайчен барт-цхьоагӀо хилар белгалдеш.