Кердача лоархӏама 34-ча моттиге эттар вай Мехкада, хӏаьта бутт хьалха 37-ча мугӏаре латтар. Вай мехкадаь юкъера боарам карарча хана 6,08 хул. Цо яхар наха хьаллоацаш, нах тӏехьаотташ болча кулгалхой тоабан юкъе ва вай Мехкада.

Республикашта хьалхалаттарий хӏама хувцадалар федеральни оагӏонца баьча соцамца, федеральни моттигаца бувзам хиларца, вахара-экономически проекташ йоаржаяра балхаца, моттигашта кулгалдераш массахана нахаца къамаьл доагӏаш, цар хьашташ теркалдеш хиларца дувзаш ба тохкама балха автораш.

Даькъастен моттигашка тахан латтача хьалаца геттара хоалуш да маьцхали беттацара Гӏалгӏайчен хувцамаш. 35-ча моттиге эттача Аьдагӏий мехка кулгалхочул Кумпилов Муратал хьалхаваьнна 34-ча моттиге эттар вай Мехкада тахан. КЧР хьалха латта Темрезов Рашид 49-ча моттиге латт, хӏирий мехка кулгалхо Меняйло Сергей 59-ча моттиге, Селий мехка кулгалхочун декхараш кхоачашдеш вола Щукин Федор 75-ча мугӏаре эттар.

Маьцхали бетта дӏабихьача балхо хьагойт моттигашта кулгал дерий гӏулакх «федеральни повестка» юкъе хиларца бувзам болаш долга. АПЭК тохкама балхаца къаьстта теркалдеш да вахара оагӏонца дувзаденнарашта, унахцӏенон, дешара хьала, тӏайоагӏача шелала боаггӏача боараме кийчо яра федеральни оагӏоно тӏахьожам чӏоагӏбаьлга. Иштта лоархӏамечарех да моттигаша федеральни, халкъашта юкъерча кхетаченашка дакъа лацар.

Гӏалгӏайчен хӏама, цӏаьхха, кхозза лакхагӏа айдалар теркалде эттача, из дувза йиш я политчески оагӏонцара гӏулакхаш тоадаларца, мехка хьалхалаттараша болх боаггӏача боараме дӏахьош хиларца, иштта федеральни оагӏонца цхьана къахьегаш хиннача хувцамашца. Бакъда, къаьстта цхьан проектаца, цхьан оагӏонцарча балхаца из дувзар нийса хургдац алар харцахьа дац: хӏама хувцадаларца хоттам болаш мел дола хӏама теркаме лоац тохкама болх дӏахьораша. Тахан вай кхетаду, республикан кулгалхочо Келаматанаькъан Махьмуд-ӏаьлас ший хӏама кхозза лакхагӏа айдеш тоадаьлга.

Карарча ханара хьал теркалдича, шоай гӏулакх дикка чӏоагӏдаь, нах тӏехьа болаш латтача миӏингий кулгалхой тоабан юкъе, йизза моттиг балаьца латт вай Мехкада.