Вай уйла-нигат довзаш да
Келаматанаькъан М-Ӏ.: «Палестинера хьал да, вайга массанега а саготдайташ»
Лайчилла бетта 14-ча дийнахьа денз 23-ча денга кхаччалца, ГӀалгӀайчен кулгалхочо Келаматанаькъан Махьмуд-Ӏаьлас къоабал а деш, дикача гӀулакха болам дӀабихьар, из хетабаь бар, Газе бахача наха гуманитарни новкъостал гулдара. Вай Кулгалхо ваха хилар новкъостал вӀашагӀтохаш хиннача моттиге-Магасе, ше лаьрххӀа тӀахьожаргволаш, мухь дӀабахьийтара гӀулакх мишта латт. Ахча гулдарал совгӀа, республикан бахархоша кхачан продукташ а иштта тӀабувха гӀирс а гулбир, кхыдола вахаре ца хилча даргдоаца товараш а дар цу юкъе, яхаш, хоам бу ГӀалгӀайчен Кулгалхочун, Паччахьалкхен зарбан болх лелабераша.
Келаматанаькъан Махьмуд-Ӏаьлас баркал аьлар болам вӀашагӀбелларашта, «Тешам» яхача цхьанкхетара «Дикача наьха клуба», лоӀамхошта, цу дикача гӀулакха юкъе дакъа мел лаьцарашта.
Вай республикан хӀара вахархо кийча хилар Газе бахача наха шоашкара новкъостал де. Палестине латташ долча хьало вай массане а сатем боабаьб. ГӀалгӀайчен бахархоша кхетабу цар бала, царга кхаьча хало, цудухьа вай декхарийла да тахан царна воашта могачох новкъостал де. Из хьал вайх хӀаране дегашкара сатем боабаь латт: вайна хов, къизало хӀалакву. Аз баркал оал гуманитарни мухь гулбеча дакъа лаьцарашта, къаьстта бахархошта, волонтерашта, хӀара дийнахьа укхаза хьа а ухаш, эшар хьаэцаш, вӀашагӀтохаш, уж хӀамаш яьшкаш чу йохкаш, цар болх барах», - аьлар Келаматанаькъан Махьмуд-Ӏаьлас.
Республикан Кулгалхочо иштта белгалдир, гуманитарни мухь гулбара болх дӀахьош бараша а из вӀашагӀбеллараша а баьр боккха болх хилар, Палестинерча наха новкъостал дара цар юкъеденар доккха дакъа хилар.
Гуманитарни новкъостал гулдеча пункте ше венача хана, Келаматанаькъан Махьмуд-Ӏаьлас белгалдир, ГӀалгӀайче массахана кийча я эшачунна новкъостал де. ЛоархӀамедар да, халкъашта юкъерча гӀулакхашка хьежжа а доацаш, наха новкъостал деш хилар, къаьстта халача хьалашка дисача берашта.
«Вай хьалаьца никъ бовзаш ба: цу тайпара къизал, моастагӀал теркал ца деш диса йиш яц, къаьстта бехк боацача берашта духьала из деш хилча», - аьлар Келаматанаькъан Махьмуд-Ӏаьлас.
Болам дӀахьош 80 миллион сом гулдаьдар, цунах эшаш мел йола хӀамаш ийцар, цу юкъе 150 тонн гуманитарни новкъостал а долаш: 5500 совгӀа кхачан кхоачам чубола яьшкаш,100 генератор, Ӏ8 тонн гаргга молхаш. Иштта бехача наха эшаш йола хӀамаш ийцар.
300 совгӀа лоӀамхо вар гуманитарни новкъостал гулдеча дакъа лоацаш, уж хӀамаш дӀа-юха нийсъеш.
ХӀанз укх сахьате, Россе МЧС викалашца дувцаш да, гуманитарни новкъостал ГӀалгӀай Республикан викалаша дахьа дезача дӀакхачийтара хаттар.
