«РФ президента Путин Владимира оагӀув хьаллоацаш ца хилча, тхона хала хургдар гӀо де. Хьалха латтача цо къоабалду, Палестинерча наха новкъостал дар. Эшаш йола хӀамаш дӀаяхьийтарал совгӀа, Газера арабаьннача наха тхоай наӀараш хьайийллай оаха. Оаха кхетаду, уж нах геттара халача хьале латтилга, ма могга царна атто е хьож тхо, Даьла къахетамца. Тхоашта могар дергда оаха, хӀара мехках вехача сага укхаза ший цӀагӀа санна атта, паргӀата хургйолаш. Из тха Далла хьалхашкара декхар да», -  белгалдир вай Мехкадас Келаматанаькъан Махьмуд-Ӏаьлас. Доккха баркал аьлар Палестинера кхаьчача наха, шоай бусалба вежарашта, йижарашта юхе хила аьттув болаш, чоагӀа гадбаха ба шоаш, аьнна, тӀатехар.

Мехкадас хаьттар; карарча хана фу эшаш, сенга сатувсаш да шо, аьнна. Палестинерча кхалнаха дийцар, деша багӀаш хиннача шоай дезалий хьал дагадоалл шоашта, аьнна. Республикерча моттигашка шоай берий деша аьттув хургбий, яхаш, сагота бар уж мискаш. Цар дийцачох, таханарча дийнахьа царна эггара чоагӀагӀа эшар, царна къувлар из да, дӀахо мел долча хӀаман кхоачам болаш ба царга. Вай Мехкадас тебир уж, дӀахо деша аьттув республике хургба, аьнна. Цхьадола лоархӀамедараш юстардаьха баьнначул тӀехьагӀа, мехкарча дешара моттигашка шоай дешар дӀаходахьа йиш хургья цар. Паччахьалкхенна тӀадиллар Мехкадас; из гулакх ма хулла сихагӀа тоадеш болх дахьо, аьнна.

«Шоай дезал дагабоахк шоана, оаха кхетаду из! Вахара ха дӀахойодаш я, Даьла къахетамца, цудухьа дешар юкъагӀдита йиш яц! Аз ма аллара, цхьаццадараш дӀа-хьа нийсдеш болх чакхбаьккхачул техьагӀа, шоай дешар чакхдаккха аьттув хургба цар»,- белгалдир Келаматанаькъан Махьмуд-Ӏаьлас.

70 саг ва Газера веха вайцига кхаьчараш. Царна юкъе дукхагӀдараш бераш да. Гостинице царна мел эшаш дола хӀама Ӏалашдаьд республико. Дийнахьа кхозза баа бӀайха кхача, лорий новкъостал, психологаш, иштта царна мел эша кхыдараш а лоаттаду республикан кулгалхоша. Вай Мехкада ше тӀахьожаш хургва вахарах беха арабаьннача цу мискашта эшача хӀаманна.