Турпалхошца вӀашагӀкхетар
ТӀема операцен юкъера цӀабаьхкача гӀалгӀай эпсарашца кхетаче йир Мехкадас
Россе тайп-тайпарча моттигашка шоай декхараш кхоачашдеш болча гӀалгӀай эпсарашца кхетаче йир Мехкадас Шолжа-Шахьарерча культуран цӀагӀа. 60 совгӀа хиннача тӀемахошта юкъера цхьаццабараш, тӀема операцен юкъера, хӀетта цӀакхаьча бар. Келаматанаькъан Махьмуд-Ӏаьлаца дӀайихьача кхетаче цар дийцар, шоашта хьалхашка латтача декхарех, Даьхен гӀулакх лорадарах. Из хоам «Сердалога» бир Мехкадаь зарбан болх лелабераша. Республикан кулгалхочо белгалдир, вай эпсараш лакха майрал, денал гойташ, къаман сий доаккхаш, иштта сий долаш хиннача шоай даьй ларах дӀаболхаш хилар.
«Тахан оаш хьахьокхаш дар вай кхоанарча вахаре даха дусаргдолаш да. ТӀехьа боагӀарашта оаш хоза масал дитарах, аз доаккхал ду шух», - аьлар Мехкадас. Кхетаче белгалбир тӀема операцен доакъашхой санна, тӀема вузашка дийша арабаьннараш.
Эпсарий аьттув хилар вӀаший бовза, накъадаргдараш дӀа-хьа эца, иштта Мехкадаьга хаттараш дала, шоашта эшар деха. Кхетаче хиннача Хьоашаланаькъан Султана белгалдир, эпсара тӀема юкъера никъ аттачарех боацилга, дуккхача моттигашка, хатар ийккхача хьалхаотта везилга.
«ТӀема операцен юкъе хьагойтад оаш шоай денал, къонахчал», - аьлар цо. Кхетаче йистейоалаш, 62 эпсара грамоташи майдилгаши елар. Вай Ӏадаташ, истори лоархӀаш болча цар, совгӀата ППШ яхача тепчан-пулемёта кеп елар Мехкадаьна. Хозача дешашца могаш, маьрша, аьттув болаш, иразе баха даькъалабийцар Мехкадас вай къаман эздий, деналах бизза бола къонгаш.
