«Тахан республикан хургдолчун боккха гӏа баьккхар оаха. Дукхача хана денз, эггара чӏоагӏагӏа эшаш хиннар дар хий, из кхоачам болаш цахиларах наьха вахарера хьалаш чоалхане дерз, иштта из ӏаткъаш да предприятей, шахьарий, юртий балха. Хий чулацара йола гӏишло хьалъяро дика, цахаддаш хий лоаттаде таро хулийтаргья Илдарха-Гӏалан, Магӏалбика, Шолжен, Шолжа кхален, иштта Магӏалбика кхален бахархошта, из дӏакхоачаш хургда лоаман юрташка: Галашка, Мужеча - бахача наха», - аьлар Келаматанаькъан Махьмуд-ӏаьлас.

Проекта керттердар да моттигерча тароний хьал леладар. Из инженерни хаттар кхоачашдаро, хий ше хьачудоагӏаш хургда насосаш а ца эшаш, цудухьа цунга хьежжа дӏадодар лораде а таро хул.

Цу лоархӏамеча проекта чудоагӏаш дола из хаттар кхоачашде карагӏдаьлар, федеральни центро из хьаллоацаш хилар бахьан долаш. Гӏалгӏайчен кулгалхочо баркал аьлар Россе Президента Путин Владимира, Федераце Совета Председатела Матвиенко Валентинайна, Паччахьалкхен Председатела Мишустин Михаила, цар терконца из хаттар сихагӏа кхоачашде аьттув баларах.

Эса тӏа хий чулацара моттиг хьалъяр - из ерригача республике хий лоаттадара дӏаболабеш болча балха хьалхара дакъа мара дац. Хьалхашкахьа ба цу даькъ тӏа бе безаш бола дукха болх: хий чулацара кӏийле хьалъяр, 90 километр керда хий дӏакхоачийташ йола балха оагӏув кийчъяр, хин турбаш кердаяхар, иштта хий чулоаттадеш йола гидравлически гӏирсаш хьадар. Проекта чудоагӏаш дола деррига балхаш кхоачашдаь даргда, 2030 шерга кхоачаш.

Келаматанаькъан Махьмуд-ӏаьлас каст-каста хоам бергба аьлар бахархошка, дӏахьош болча гӏишлон балхах, иштта тӏахьийхар юкъарлон тӏахьожам лоаттабара: «Сона нийса хет республикан бахархой оагӏорахьара а цу гӏулакха тӏахьожам лоаттабеш хилар. Цхьана дӏахьош болча балхо таро лу вайна, дикал йолаш, ший ханнахьа из проект кхоачашъе».