- Лана, маца дӏаболабелар хьа кхоллама болх?

- Сона зӏамига йолаш безабелар сурташ дехкаш бола болх, бакъда са кхоллама болх дӏаболабелар догамаш деш. Цу хана денз, аз лорабеш массехк болх уллаш ба са, цхьадараш совгӏата а делар. Къоаламашца деш дола сурташ са дика хьахулар, бакъда басарашца ӏомаяла чӏоагӏа безам болаш яр со. 2021 шу чакхдоалаш, сона яйра Интернете видеоролик, цига хьалхадоахар профессиональни басарашца гаьнаш мишта е еза. Сона из чӏоагӏа дезаделар, со эттар из сай мишта хьахул хьажа. Сона карагӏдоалар баьцовгӏаш хоза хьае. Тӏехьа тӏабенача пхе бетта со ӏомалуш хилар из болх бе компьютерга гӏолла йолча урокашкара. 2022 шера са цӏагӏарчар мах оттабир са хьалхарча кхоллама, из бар басарашца баь болх.

- Фуд хьога хаьттача сурташ дахкар?

- Сурташ дахкар - из са эггара дукхагӏа беза болх ба. Из болх аз беча хана, сона дицлу сай лазар, кхыдола кхоачамбоацараш а дагара дӏадоал дицделе. Сона сапаргӏато лу цо.

- Малагӏча даькъе я хьо болх беш?

- Дукхагӏча даькъе аз ӏалама сурташ дехк, иштта деза сона хоза цӏенош. Хӏанзарчоа сайна фу карагӏдоал хьожаш я со тайп-тайпарча даькъ тӏа.

- Мишта хет хьона, сенца тӏаозаргбар ӏа белггала бола нах?

- Со тешаш я, моллагӏа волча сага вахаре шийна дезаш цхьа хӏама хила деза, цунна дегагӏозале яхьаш. Вай дерригаш а декхарийла да укх дунен тӏа воай лар йита. Лохаш хила, ма кхера гӏалат далар! Дика толам - из наха тӏаэцар, хьайх тешаш хилар, гонахьара нах безаш хилар да.

- Малагӏа халонаш нийслу дӏаболалуш суртанчашта?

- Халонаш дукха я. Хьалхарча аргӏагӏа ше дӏахьош болча балха говзал лакха йолча сагаца дагавоалаш хила веза, со-се ӏомаенна хиларах, цхьацца йола халонаш сона духьала нийслуш яр, бакъда дог ца эккхаш ше хьалаьца никъ дӏабахьа беза. Дукхагӏча даькъе тахан суртанчашта эшаш яраш интернет-тикаш я, е гаргарча нахага цхьацца дола басараш да ала дезаш хул. Из доацаш а, басарашта маьхаш тӏакхеташ латт, дукхагӏа из бахьан долаш а догьэккхаш хул цхьайолча хана.

- Малагӏча яхьашка дакъа лоацаргдар ӏа тахан?

- Сона чӏоагӏа ловш дар сай болх гойтар. Дукхагӏа дола сурташ аз дехкад, совгӏата а деннад. Хӏанз гойтам дӏабахьара лаьрӏха дола сурташ деш я со.

- Къаьстта сурташ дехкар доацаш, кхыдола начӏал дий хьа?

- Сурташ дехкаш хиларо хьоа дика болх беш хулийт, сакхетам а лакха хул, халахетараш дӏадоах. Цул совгӏа, сона хоза хеташ дар да зизашта ӏунал дар, кердача фух дараш доаржадеш; иштта сай нанна новкъостал ду аз, книжкаш деш.

Лоацца хоам:

Кхоартой ӏамархана Лиана Гӏалгӏай мехка яьй, 1998 шера наджгоанцхой бетта 14-ча дийнахьа. Дешаш хиннай Республикански могашал эшаеннача берий центре (РЦДО), ший цӏагӏа а йолаш.

2017-ча шера ишкол яьккхай.

Тӏеххьарча пхе шера тӏатеӏӏа сурташ дехкаш я, ший вахар хетадеш дезала, шийна дезача гӏулакха.