Юриста дешар дийша вола, «Негасим» яхача байтий автор, тамашийна «Geledron» моттиг хьайийлла саг, хьалхарча Гӏалгӏайчен «Сайти сын Зоули» яхача фильме дакъа лаьцар ва.

Мишта вӀаштӀехьадоал цхьан сага ишттал тайп-тайпара вахара наькъаш леладе? Цох а, кхы дукхача наькъех а оаха дувцаргда Салмана Мухьмадаца тхоай хиннача къамаьле.

- Мухьмад, Ӏа леладеча вахара наькъашка хьежача хеталу, массехк бустамца хьо вахаш санна. Юриспруденци чӀоагӀача законий дуне да; дошо пхьоал - из кхоллам, кӀаьда, хоза болх ба; хӀаьта поэзи- из кӀоаргал, дег чура хьайоагӀа оаз я. Дувцал вайна, боккъал, мишта дӀаболабелар хьа никъ дошоча пхьара даькъ тӀа? Сево сомабаьккхар хьа безам законаш тохкаш хиларал совгӀа, иштта хьай кулгашца ер хозал хьакхолла?

- ӏа дика зийра из хьал. Хеталуш а да цкъа хьалхагӀа хьежача, уж наькъаш геттара башхало йолаш да аьле, бакъда сона уж шоайла вӀаший хотталуш санна хет. Со дошоца болх бе волавелар вӀалла сайна дагадоацаш, университете деша вагӀаш. Сона, цӀаьхха, нийсделар Интернете говзанчий болх тӀабола сурташ, циггара чӀоагӀа безабелар сона из болх. Фу дар-хьогӀ сайна фу карагӀдоал хьежача, аьнна, дагадехар сона. Кхы доккха хӀама сайна ховргда, аьнна, ца хеташ, со хьежар юххьанца эггара аттагӀдар де. Са хьалхара болх бар хоза кхерилгаш тӀалатташ бола кулгах боаллабу гӀоз. Аз сайца деша багӀачарга из дӏахьекхача, уж болабелар, карара кара телаш, цунга хьежа, цу хана сона хайра цу даькъ тӀа болх бе сай таро йолга. Итт шу да со цу тамашийна хозача балха даькъ тӀа къахьегаш вола.

- Мишта дегӏадера хьа пхьоал, из хьалхара гӀоз баьчул тӀехьагӀа?

- ТӏехьагӀа, дийша ваьлча, со юкъевера ГӏалгӀайчен кулгаговзала ассоциацена. Цо таро елар сона кхычар болх мишта бу хьажа, иштта сайна ховш дар дӀагойта, республике меттел цул арахьа а. Аз дакъа лаьцад дукхача гойтамашка. Со тешаш вар даим - моллагӀа бола болх - юриспруденци е дошо пхьоал - пайда бахьаш хургба, нагахьа санна дег чура из беш хилча, даим хьайна ховш дар дегӀадоаладеш, гонахьарчарна а хьайна а пайда беш хьо хуле.

Дошоца болх бе волаваларо сона хьалхашка дукха наӀараш хьайийллар, сона сай вахар иразе хийтар. Цох сона, е дешара а е кхыча балха а новкъа доацаш, дика новкъостал хилар вахаре. ХьалхагӀа ца бовзаш хинна дукха нах байзар. Укх шерашка аз хьакхеллар ворхӀ-бархӀ эзар совгӀа хоза хӏама. Аз беш бола болх дӀакхоачаш ба кхыметтел Европе а, цига каст-каста довзаш хул са балхаш. Из чӀоагӀа дика а хет, цо низ совбоаккх.

- Хьа балха цӀи «GELEDRON» я. Фу яхилга да из?

- Жоп геттара аттагӀа дарех да. «GELEDRON»(Геледрон) -из цӀи яр цкъа хьалхагӀа бувзама оагӏонашка атта кора а яь, цул тӀехьагӀа балха цӀи хила езаш. Сона ловра из йоаккхаш атта хилар, дагалоацалуш хилар, цунца цхьана ший тайпара екаш а, хӀана аьлча хьалхагӀа сона дагаеха хинна цӀераш чоалхане яр, йоаккхаш а атта яцар. Тӏаккха фуд цу цӏерца - из да атта а, накъадоалаш а хилар цунца дувзаденна хьалаш.

- Дошоца болх беш хиларал совгӀа, ӏа дакъа лаьцар Гӏалгӏайчен хьалхара, Ӏамарханаькъан Амура «Сайти Зоуле воӏ» яха фильм доаккхача. МалагӀа декхар дар хьона хьалхашка лаьттар? Дувцал вайна цох лаьца.

- Из чӀоагӀа хоза, лоархӀаме дакъа дар са вахаре! «Сайти Зоуле воӏ» яха фильм даккхара эшаш дар кӀерамаш лоаттадергаш, цу ханарча исторе кепара хила дезаш дар уж. Амура сога ше къаьстта дехар дир. Уйла ел оаш: хьалха вӀалла аз яь йоаца ши хӀама, шин дийнахьа кийчъе езаш яр! Из дар доккха декхар. Бакъда аз из декхар кхоачашдир, уж ши гӀирс хӀанз фильма музее латташ ба. Цу тайпарча хьало сога доаккхал дайтарал совгӀа, сона новкъостал дир, Ӏамарханаькъан Амура бӀарчча метраж йолча «Каьхат» яхача фильме дакъа лаца. Цига аз хьакхеллар фильма юкъедоагӀача хӏамай куц, из доаккхача дакъа лоацаш хилар со. Аз болх бир тоабаца цхьана ГӏалгӀайчен лоамашка. Из доккха дикахетар дар сона, дика дагалоаттам бар, аз доаккхал дора сай къаман, хьамсарча республикан се накъавоалаш хиларах. Кхы доккха деце а, лоархӀаме дакъа хетар сона айса юкъедихьачох.

- ӏа яздаьд «Негасим» яха байтий книжка. Фу дувцаш да из? Сево низ лу хьона цу тайпара мугӀараш язде?