Келаматанаькъан Махьмуд-Ӏаьла гонахьарча тоабан балха юкъе нийслуш хинна кхоачамбоацараш дар юххьанца даьлла доккха республикан декхар, цо юхатохар моллагӏа йола вахара проекташ. Бакъда бюджета политика чӏоагӏа а нийса а дӏахьош хиларах, дӏадодар лорадеш, федеральни центраца болх тоабеш хиларах, республика хьалъяьлар цу халонашкара - лоархӏам болаш лаьгӏдир паччахьалкхен декхар, ахчанцара хьал а тоадир.

Цунца цхьана республико гойтар ший доалахьардар лерттӏа леладеш хилча, таронаш тоае йиш йолга. Гӏалгӏай мехка бизнес лелаяра хьал тоадарах, Гӏалгӏайчен администраце ший болх нийса дӏахьош хиларах, йоалах бола пайда моттигерча бюджете чубоагӏаш хилар.

Ахчанцара таро тоаяла йолаелча, экономикан даькъ тӏара хьал а тоаделар. Республике промышленни оагӏув лакхъяла йолаелар. Республикан Паччахьалкхенна карагӏдаьлар, дика толамаш даьха а ца ӏеш, къаьнара хаттараш кхоачашде - шераш доахаш, болх ца беш лаьтта предприятеш болх бе йолаелар. Уж балха юкъеяларах республике керда балха моттигаш а хилар, керда инвестицеш юкъеяьлар, цу юкъе агропромышленни комплекс а йолаш, иштта туристически оагӏув дегӏаера, из республикан таханара юхь я.

Гӏалгӏайчено даьхача лакхача толамашта мах оттабир федеральни боарам тӏа. Российски Федераце Паччахьалкхено цкъа белгалдаь ӏийнадац мохк вахара-экономически дегӏаахара даькъ тӏа лакха толамаш доахаш хилар, цунца цхьана цхьацца долча промышленни, юртбоахамий оагӏув дегӏаяр а хьоадеш.

Цу тайпара тешам а луш, республика дегӏайоагӏаш хиларо дӏахо а ше дӏадоладаьр дӏадахьа таро елар. 2024 шера тов бетта 8-ча дийнахьа, Гӏалгӏайчен Халкъа Гуллама депутаташа, цхьа барт болаш, юхахержар Келаматанаькъан Махьмуд-Ӏаьла.

Тахан, ворхӏ шера республикан доал деш, Келаматанаькъан Махьмуд-Ӏаьла дӏахо а Гӏалгӏайче дегӏаяра ше хьалаьца никъ дика дӏахьош ва. Цун керттерча декхарашта юкъе латт керда ишколаш, дарбанчеш, берий бешамаш хьалъяр; коммунальни даькъ тӏара вахара хьалаш кердадахар; СВО бӏухошта, цар дезалашта новкъостал дар; иштта йоккхий къаман проекташ кхоачашъяр.

Цу балха хьалха санна керттера маӏан да республикан бахархой вахара хьалаш тоадар, цхьоагӏо йолаш, кхоане тешаме йолаш, вахар хьакхоллар.